Tvískipting elítu og almennings í vestrænum samfélögum

„Þetta er spurning um það að embættismenn, þingmenn og ráðherrar, geta ekki leyft sér að nota aðstöðu sína á þingi til þess að verða sjálfum sér úti um meiri launahækkanir heldur en annað fólk í landinu fær,“ segir Styrmir Gunnarsson, fyrrverandi ritstjóri Morgunblaðsins um ákvarðanir kjararáðs.

Hann var gestur Kristjáns Kristjánssonar í þjóðmálaþættinum Sprengisandi í morgun.

Styrmir gerði tilraun til að greina þjóðfélagsástandið á vorum dögum en í henni hverfast átökin í kringum elítur. Allt tal um sósíalisma og kapítalisma sé að mestu liðin tíð.

„Nú held ég að það sé að verða hérna – ekki bara á Íslandi heldur einnig á vesturlöndum – einhvers konar tvískipting á milli einhverra hópa sem eru kallaðir elítur og allra hinna. Hverjar eru þessar elítur? Það eru ekki endilega einhverjir auðkýfingar í viðskiptalífinu. Það er bara fólk sem er í sérstakri aðstöðu í samfélaginu hverju sinni. Það er fólk í öllum flokkum sem notfærir sér aðstöðu sína sér í hag.“

Kjararáðsáhrifin

Til þess að renna stoðum undir mál sitt tók Styrmir þverpólitískt dæmi. „Það hefur komið mjög skýrt fram í sambandi við kjararáð. Ég hef aldrei skilið hvernig í ósköpunum á því stóð að Alþingi afnam ekki ákvarðanir kjararáðs haustið 2016 alveg eins og þingið gerði bæði 1992 og 2005 vegna þess að það blasir við að þessar ákvarðanir um launahækkanir æðstu embættismanna, þingmanna og ráðherra og svo framvegis valda miklum usla á vinnumarkaðnum.“

Að sögn Styrmis situr íslenska þjóðin uppi með afleiðingarnar af þessum gjörningi. Það sé ekki hægt að segja við ljósmæður að allt þjóðfélagið fari á hvolf fái þær umbeðnar hækkanir og þegja síðan þunnu hljóði um ákvarðanir kjararáðs.

Hér að neðan er hægt að hlusta á viðtalið í heild.