Eftirlitsmyndavélar settar upp í Kópavogi

Eftirlitsmyndavélar verða settar upp í á Fífuhvammsvegi og við Skógarlind á næstu vikum. Skrifað hefur verið undir samning á milli Kópavogsbæjar, Neyðarlínunnar og lögreglunnar á höfuðborgarsvæðinu um myndavélarnar en í honum er tryggt að eingöngu lögreglan hefur aðgang að efni vélanna.

Þær vélar sem settar verða upp í maí greina númeraplötur á öllum leiðum inn í Kópavog austan við Reykjanesbraut.

Eftirlitsmyndavélarnar voru á meðal þess sem íbúar Kópavogs völdu áfram í kosningum í verkefninu Okkar Kópavogur en íbúakosningarnar fóru fram í janúar og febrúar síðastliðnum.

Fleiri myndavélar verða settar upp í sumar og haust og verða staðsetningar þeirra kynntar síðar, að því er fram kemur í tilkynningu frá Kópavogsbæ.