Skoða aðgerðir gegn ódýrum eftirlíkingum

Mörg hundruð pantanir hafa verið gerðar á eftirlíkingum af íslenska landsliðsbúningnum á kínversku netversluninni Ali Express. Eftirlíkingarnar kosta ekki nema sjöunda hluta af verði frumgerðarinnar sem seld er hér á landi. Framkvæmdastjóri KSÍ boðar aðgerðir.

Á vef Ali Express er hægt að fá ómerkta fullorðinstreyju á um 1.600 krónur samanborið við 11.990 krónur hjá söluaðilum hér á landi. Eftirlíkingarnar rokseldust einnig fyrir EM 2016, við litla hrifningu umboðs­aðila Errea á Ísland og KSÍ. Nú eru þær farnar að streyma til landsins á nýjan leik fyrir HM með tilheyrandi tekjutapi fyrir Errea, KSÍ og söluaðila hér á landi. Tjónið fellur að stærstum hluta á Errea en KSÍ fær einnig sinn skerf af söluandvirði hverrar treyju.

Í aðdraganda EM 2016 leituðu Errea og KSÍ til póstsins og tollyfirvalda um að fá allar sendingar á eftirlíkingum utan úr heimi stöðvaðar í tollinum þar sem þeim yrði fargað á grundvelli hönnunarverndar. Klara Bjartmarz, framkvæmdastjóri KSÍ, kveðst ekki hafa upplýsingar um hverju þær aðgerðir skiluðu en málin séu aftur til skoðunar nú.

„Við erum meðvituð um stöðuna og höfum verið að skoða hvað við getum gert. Almennt erum við að reyna að vernda vörumerki okkar. Við erum með aðila sem gætir að vörumerkinu og hvernig það er nýtt. Það eru bara ákveðnir samstarfsaðilar sem hafa leyfi til að nota okkar merki. En við erum að gera eitthvað í þessu. Það er víða verið að stökkva á HM-vagninn.“

Nokkrir söluaðilar bjóða íslensku treyjuna á Ali Express en þar sést einnig að mörg hundruð pantanir hafa verið gerðar. Þá nota hinir óprúttnu aðilar opinbera kynningarmynd KSÍ og Errea af búningunum til að selja vöru sína, nema að merki Errea hefur í flestum tilfellum verið fjarlægt af myndunum. Merkið virðist hins vegar vera á þeim treyjum sem borist hafa hingað ef marka má myndir sem Íslendingar hafa birt á samfélagsmiðlum, sáttir með kaupin.

Aðspurð hvort treyjan sé of dýr hér segir Klara að fótboltabúningar séu bara dýrir.

„Við vitum þó hvar Errea-treyjunar eru framleiddar. Ég hef sjálf komið í verksmiðju Errea á Ítalíu og veit hvernig aðbúnaður fólks er og hversu gamalt fólkið er sem vinnur þar. Það finnst mér skipta máli. Hvort að ódýrari treyjurnar séu framleiddar á þann hátt og af slíkum gæðum skal ég ekki segja.“