Herða reglur um þungunarrof

Ríkisstjóri Mississippi samþykkti í gærkvöldi breytingar á fóstureyðingalöggjöf ríkisins sem sagðar eru þær ströngustu í gervöllum Bandaríkjunum.  Gagnrýnendur breytinganna telja þær stangast á við stjórnarskrá Bandaríkjanna.

Hin nýja löggjöf kveður á um bann við þungunarrofi eftir fimmtándu viku og á því eru gerðar fáar undantekningar. Konur sem verða þungaðar eftir nauðgun eða sifjaspell geta til að mynda ekki lengur farið í fóstureyðingu í Mississippi þegar meira en 15 vikur eru liðnar af meðgöngunni.

Hins vegar verður áfram hægt að rjúfa þungun að þessum tíma liðnum þegar líf móðurinnar er talið vera í hættu eða þegar fóstrið er alvarlega vanskapað.

Mississippi hafði áður leyft þungunarrof fram 20 viku meðgöngunnar. Ríkisstjórinn, Phil Bryant, tilkynnti í gær að með breytingunum vonaðist hann til að ríki sitt yrði „öruggasti staður í Bandaríkjunum fyrir ófædd börn.“

Baráttufólk fyrir kvenréttindum hefur kært nýju löggjöfina og segir að hún stangist á við hinn sögufræga Roe v. Wade-úrskurð frá árinu 1973, sem varð til þess að þungunarrof var löglegt í Bandaríkjunum.

Donald Trump Bandaríkjaforseti hefur barist fyrir breytingum á alríkislöggjöfinni sem kveður á um bann við þungunarrofi eftir 20 viku. Frumvarp sem hann lagði fram í janúar síðastliðnum var hins vegar stöðvað í öldungadeildinni.