Nýtt myndband frá Hildi: "Virðist fá fólk til að gráta“

Tónlistarkonan Hildur frumsýnir í dag nýtt tónlistarmyndband á Vísi og er það við lagið Water.

Lagið og textann samdi hún sjálf. „Það er alltaf einhver sérstök upplifun að flytja þetta lag. Það er svo beint frá hjartanu og þetta er svona lagið mitt sem virðist fá fólk til að gráta. Það er frekar fallegt hrós fyrir tónlistarfólk að fá. Ekki að maður vilji að fólk gráti, en ef það snertir við fólki svona, þá finnst manni maður vera að gera eitthvað rétt,“ segir Hildur.

Myndbandið var tekið upp á Korpúlfsstöðum og segist Hildur hafa leitað lengi að réttu húsnæði fyrir lagið.

„Mér langaði að hafa umhverfið hrátt og kalt, sem mótstöðu við lagið. Ég fékk frábæra söngvara úr Miðbæjarkvartettinum og sellóleikara til að flytja nýja útsetningu sem ég samdi sérstaklega fyrir myndbandið og ég er ótrúlega ánægð með útkomuna. Ég var með gæsahúð nánast allan tímann sem við tókum upp, en kannski var það smá af því að það var mjög kalt þarna.“

Eilífur Örn leikstýrir myndbandinu og Hrafn Garðarsson sá um myndatöku. Hljóðið var tekið upp og mixað af Arnar Guðjónssyni.