Ásökun um svik af verstu sort

 „Það væru svik af verstu sort við Vestfirðinga ef ekki verður tenging milli svæða á Vestfjörðum allt árið um kring,“ segir bæjarstjórn Ísafjarðarbæjar sem mótmælir „harðlega seinagangi í hönnun og undirbúningi vegna lagningar nýs vegar yfir Dynjandisheiði, milli Flókalundar, Dynjanda og Bíldudals“.

Þá segir bæjarstjórn sérstaklega ámælisvert að ekki hafi verið sett til hliðar fjármagn á árinu 2018 til að hefja framkvæmdir við nýjan veg yfir Dynjandisheiði, líkt og gildandi samgönguáætlun mælir fyrir um. „Vegurinn um heiðina mun leysa af hólmi 60 ára gamlan moldarveg. Þessi vinnubrögð eru áfellisdómur yfir aðkomu Alþingis að frágangi fjárlaga yfirstandandi árs,“ segir í bókun bæjarstjórnarinnar.

„Alla tíð hefur legið fyrir að vegur um Dynjandisheiði og Bíldudalsvegur eru nauðsynleg forsenda þess að Dýrafjarðargöng nýtist Vestfirðingum sem samgöngubót, enda hefur það jafnan verið óumdeild krafa sveitarfélaga á Vestfjörðum að þessir vegir verði tilbúnir þegar kemur að verklokum jarðganganna.“