Býst við því að niðurstöður í máli Braga verði birtar í dag

Margrét Erlendsdóttir, upplýsingafulltrúi velferðarráðuneytisins, á von á því að niðurstaða sem liggur fyrir í athugun velferðarráðuneytisins í máli Braga Guðbrandssonar, forstjóra Barnaverndarstofu, verði birt í dag.

Athugun var sett í gang af hálfu ráðuneytisins eftir að Barnaverndarnefndir á höfuðborgarsvæðinu leituðu formlega til velferðarráðuneytisins í ráðherratíð Þorsteins Víglundssonar í nóvember á síðasta ári. Formenn nefndanna sendu formlegt bréf með umkvörtunum barnaverndarstarfsmanna á hendur Braga.

Í bréfunum var kvartað yfir starfsháttum Braga og hann sakaður um óeðlileg afskipti af einstökum málum. Á föstudag tilkynnti velferðarráðuneytið að Bragi væri útnefndur sem framboðsefni Íslands til Barnaréttarnefndar Sameinuðu þjóðanna þrátt fyrir ásakanir starfsfólks barnaverndarnefnda á höfuðborgarsvæðinu.

Vilja tryggja að formennirnir fái niðurstöðurnar áður en þær verða birtar opinberlega 

„Fjölmiðlar hafa verið að spyrjast fyrir um og óskað eftir því að fá þessar niðurstöður en ráðuneytið er ekki búið að svara neinum fjölmiðlum eða láta þessi gögn af hendi vegna þess að það er númer eitt að hafa það alveg á hreinu að formenn barnaverndarnefndanna sjálfra séu komnir með niðurstöðurnar áður en að aðrir fá þær,“ segir Margrét í samtali við Vísi.

„Ég á frekar von á því að þetta verði birt en þetta er allt svo nýtt. Fjölmiðlar voru farnir að óska eftir bréfum til nefndanna áður en búið var að senda bréfin út þannig að það var aðeins of snemmt að bregðast við því,“ segir Margrét sem þorir ekki að fullyrða að niðurstaðan verði birt í dag en segir þó að sér finnist það ekki ólíklegt.

„Þá verður send út tilkynning eins og venjulega er gert og vakin athygli á því.“