Sveinn nýr fjölmiðlafulltrúi utanríkisráðuneytisins

Sveinn H. Guðmarsson hefur verið ráðinn fjölmiðlafulltrúi utanríkisráðuneytisins. Þetta kom fram í tölvupósti sem sendur var á umsækjendur í dag. Alls sóttu 75 manns um starfið.

Sveinn hefur starfað sem upplýsingafulltrúi Landhelgisgæslunnar síðan í desember 2016. Þar áður starfaði hann lengi hjá fréttastofu RÚV, auk þess sem hann sinnti þar öðrum verkefnum.

Urður Gunnarsdóttir hefur gegnt stöðunni frá ársbyrjun 2008 en hún mun taka við nýrri stöðu innan ráðuneytisins. Mun hún sinna verkefnum tengdum upplýsingum og greiningu á utanríkismálum.

Fjölmiðlafulltrúi ber ábyrgð á fjölmiðlatengslum, samfélagsmiðlum og ritstýrir vef ráðuneytisins. Umsóknarfrestur var til 13. nóvember.