Vinnumarkaðurinn gegnir lykilhlutverki í baráttunni gegn einelti, ofbeldi og áreitni

Frumkvæði vinnumarkaðarins gegnir lykilhlutverki þegar kemur að því að grípa til aðgerða gegn einelti og hvers kyns ofbeldi og áreitni í samfélaginu að sögn forsætisráðherra. Skipaður verður starfshópur á næstunni sem mun kortleggja áreitni og ofbeldi á vinnumarkaði.

Vinnueftirlitsi, stjórn Vinnueftirlitsins og Velferðarráðuneytið stóðu fyrir morgunverðarfundi á Grand hótel í morgun en tilgangur fundarins var að vekja athygli á mikilvægi þess að efla forvarnir á sviði vinnuverndar með sérstaka áherslu á einelti, kynferðislega áreitni, kynbundna áreitni og ofbeldi á vinnustöðum og var fundurinn vel sóttur. Félags- og jafnréttismálaráðherra greindi frá því að á næstu dögum muni hann skipa starfshóp sem fær það hlutverk að kortleggja og rannsaka áreitni á vinnumarkaði.

„Auðvitað eigum við að stefna að því að útrýma slíku og það er auðvitað yfirskrift fundarins hér í dag en ég held að við verðum alltaf að vera vakandi og umræðan verður alltaf að vera lifandi,“ segir Ásmundur Einar Daðason, félags og jafnréttismálaráðherra, í samtali við Stöð 2.

„Það er auðvitað gríðarlega mikilvægt að forsvarsmenn á vinnumarkaðnum sjálfum séu í forystu þarna vegna þess að ég held að það sé lykillinn að því að ná fram breytingum,“ bætti hann við. Undir þetta tekur Eyjólfur Sæmundsson, forstjóri Vinnueftirlitsins.

„Fyrst og fremst þarf að tryggja stöðu þolenda og tryggja að úr málum sé leyst og gera þá ráðstafanir á vinnustöðum til þess að það geti ekki orðið endurtekning,“ segir Eyjólfur en það var Vinnueftirlitið og stjórn þess sem áttu frumkvæði að því að halda fundinn.

Gerendur þurfa að breyta hegðun sinni

Fundarmönnum var tíðrætt um MeToo-byltinguna og áhrif hennar en formaður BHM gerði aftur á móti heilann og það hvernig við hegðum okkur að umræðuefni.

„Stundum náum við ekki að haga okkur skynsamlega og það er mjög mikilvægt að við kunnum aðferðirnar og þetta er nú það sem við kennum börnum í uppeldi til þess að taka á hegðun og breyta hegðun sem er óæskileg og það er auðvitað það sem að gerendurnir þurfa að gera,“ segir Þórunn.

Undir lok fundarins var borin upp viljayfirlýsing og hún undirrituð af stjórnvöldum, aðilum vinnumarkaðarins, fyrirtækjum, stofnunum og félagasamtökum. Hægt er að kynna sér efni yfirlýsingarinnar og skrifa undir hana rafrænt hér.

„Hér erum við að skrifa undir viljayfirlýsingu um að við ætlum að grípa til aðgerða og ætlum ekki að láta þetta viðgangast. Við lítum á þetta sem okkar verkefni sem samfélags og hins vegar að við séum reiðubúin með ferla og aðgerðir til að takast á við það ef eitthvað svona kemur upp,“ segir Katrín Jakobsdóttir forsætisráðherra sem flutti opnunarerindi á fundinum í morgun.