Rústuðu H&M verslunum í mótmælaskyni

Lögregla í Suður-Afríku skaut gúmmíkúlum til þess að dreifa hópum mótmælenda sem mótmæltu fyrir utan búðir sænska verslunarrisans H&M í Jóhannesarborg. BBC greinir frá.

Á myndskeiðum sem birt hafa verið á samfélagsmiðlum má sjá hvernig mótmælendur hlupu um verslanir H&M og gengu berserksgang.

Mótmælin eru tilkomin eftir að verslunin auglýsti nýja peysu til sölu en í auglýsingunni má sjá þeldökkan ungan dreng í hettupeysu með áletruninni „svalasti apinn í frumskóginum“ (Coolest monkey in the jungle).

Var auglýsingin harðlega gagnrýnd og hefur H&M beðist afsökunar á henni auk þess sem peysan hefur verið tekin úr sölu.