Betra að leggja snemma af stað ef förinni er heitið um norðanvert landið á Þorláksmessu

Á morgun, Þorláksmessu, gengur í norðaustanátt með snjókomu og skafrenningi á norðan og austanverðu landinu. Veðrið mun versna fyrst á Vestfjörðum í fyrramálið en síðan norðan- og norðaustantil síðdegis á morgun.

Viðbúið er að blint verði á fjallvegum og því varhugavert ferðaveður, einkum annað kvöld. Ljóst er að margir verða á faraldsfæti á morgun fyrir jólahátíðina.

Samkvæmt upplýsingum frá Veðurstofu Íslands er viðbúið að færið verði slæmt á Vestfjörðum en talið er á þessari stundu að hyggilegast sé að leggja snemma af stað ef förinni er heitið um norðanvert landið.

Best er að fylgjast með færð á vegum á vef Vegagerðarinnar  og leita sér stöðugt nýrra upplýsinga um færið á meðan förinni stendur. Einnig er hægt að hringja í upplýsingasíma Vegagerðarinnar, 1777. 

Á vef Vegagerðarinnar er einnig hægt að sjá upplýsingar um hvernig vetrarþjónustu er háttað á vegum um landið. Það má sjá með því að smella hér.

Veðurhorfur á landinu næstu daga:

Á morgun:

Gengur í norðaustan 10-18 í nótt og á morgun, með snjókomu og skafrenningi, fyrst á Vestfjörðum en á Norður- og Austurlandi síðdegis. Heldur hægari sunnan heiða og úrkomulítið en fer einnig að snjóa um landið sunnanvert annað kvöld. Hiti nálægt frostmarki, en víða frost 2 til 7 stig á morgun.

Á sunnudag (aðfangadagur jóla):

Norðaustan 8-15, hvassast NV-til. Snjókoma norðan og austantil, en él í öðrum landshlutum. Frost 2 til 8 stig, en fer kólnandi með kvöldinu.

Á mánudag (jóladagur):

Norðaustan 8-15 m/s með éljum, en rofar til sunnan- og vestanlands. Frost 3 til 15 stig, kaldast í innsveitum NA-lands.

Á þriðjudag (annar í jólum), miðvikudag, fimmtudag og föstudag:

Norðan og norðaustan 8-15 m/s. Él víða norðan og austantil en bjartviðri sunnan heiða. Frost 2 til 12 stig, kaldast inn til landsins.