Félag Eyþórs Arnalds kaupir Whales of Iceland hvalasýninguna

Eignarhaldsfélag Special tours hefur keypt Whales of Iceland sem rekur hvalasýningu á Grandanum, og verða fyrirtækin hér eftir rekin sem systurfélög. Félögin munu sameina krafta sína og veita viðskiptavinum sínum betri þjónustu og aukna upplifun í tengslum við hvalaskoðun og aðra afþreyingu. Þetta kemur fram í tilkynningu frá Special Tours.

Þar segir að Special tours sé þjónustu- og markaðsfyrirtæki í ferðaþjónustu sem leggur áherslu á siglingar í afþreyingarskyni allt árið um kring. Félagið gerir út frá Gömlu höfninni í Reykjavík, sem er eitt vinsælasta svæði meðal ferðamanna í borginni, og býður meðal annars upp á hvalaskoðunarferðir, norðurljósaferðir á sjó, lundaskoðunarferðir og sjóstangaveiði. Félagið, sem á 20 ára rekstrarsögu, hefur vaxið mikið undanfarin ár og sagt vinna stöðugt að því að bæta þjónustu sína og upplifun viðskiptavina.

Dótturfélag Special tours opnaði nýverið kaffihús og bistro við Gömlu höfnina undir merkjum Reykjavík Röst Bistro þar sem boðið er upp á gæða kaffi, áfenga drykki og léttar veitingar frá morgni til kvölds. Í tilkynningunni kemur fram að Special tours hafi aukið vöruframboð og styrkt bátaflota sinn á undanförnum misserum. Árið 2016 keypti félagið skipið Lilju, 189 farþega útsýnisskip með mikinn ganghraða en félagið mun einnig taka við nýjum hraðskreiðum RIB bát fyrir áramót sem mun hefja siglingar vorið 2018.

Whales of Iceland er stærsta hvalasýning Evrópu og þar býðst gestum að fræðast um hvali innan um líkön af hvölum í fullri stærð. Sýningin var opnuð árið 2015 og hefur notið mikilla vinsælda jafnt meðal Íslendinga sem erlendra ferðamanna. Á sýningunni er boðið upp á leiðsögn þar sem gestum er gerð grein fyrir mismunandi tegundum hvala sem sést hafa við Ísland og sérkennum hverrar tegundar. Sýningin býður upp á gagnvirkt sýningarefni og geta gestir jafnframt skoðað lífríki sjávar í sýndarveruleika.

Whales of Iceland var að fullu í eigu ITF I, sjóðs í stýringu Landsbréfa. Eftir viðskiptin verður sjóðurinn minnihlutaeigandi í eignarhaldsfélagi Special tours en Eyþór L. Arnalds áfram meirihlutaeigandi í gegnum fjárfestingarfélag sitt.