Ragnar Þór segir ekkert tilefni til vantrausts nú

Ragnar Þór Pétursson, nýkjörinn formaður Kennarasambands Íslands, hvetur þær Þórunni Sif Böðvarsdóttur og Halldóru Guðmundsdóttur til að halda framboði sínu til varaformanns KÍ til streitu.

Ásakanir á hendir honum um blygðunarsemisbrot hafi legið fyrir í um fjögur ár og hafi hann til að mynda greint frá þeim þegar hann tilkynnti um framboð sitt í október síðastliðinum. Því sé ekki ástæða fyrir þær til að lýsa yfir vantrausti á hann nú. Ragnar Þór segist að sama skapi ekki ætla að skapa það fordæmi fyrir forystu sambandsins að segja af sér eftir að hafa orðið „fyrir þessari tegund ofbeldis í starfi.“

Ragnar Þór Marinósson, 34 ára Tálknfirðingur, lýsti því í viðtali við Vísi á sunnudag að Ragnar Þór kennari hefði sýnt sér klám. Þá var Talknfirðingurinn að eigin sögn tólf ára en Ragnar Þór að stiga sín fyrstu skref í kennslu fyrir vestan. Ásökunin hrakti Ragnar Þór tímabundið úr starfi árið 2013 þegar málið kom fyrst upp. Ragnar Þór var kjörinn formaður KÍ í síðasta mánuði og tekur við starfinu í apríl.

Sjá einnig: Ásökunin snerist um furðulegt klám á heimili kennarans

Á framboðsfundi með frambjóðendum til varaformanns Kennarasambands Íslands í gærkvöldi lýstu tveir frambjóðendur, þær Þórunn og Halldóra, yfir vantrausti á Ragnar Þór. Muni hann ekki segja af sér ætli þær að draga framboð sín til baka.

Sögðu þær að eftir viðtalið við Tálknfirðinginn um helgina væri staða Ragnars Þórs gjörbreytt. Þar hefðu komið fram ásakanir um brot sem myndu gera formanni KÍ erfitt að tjá sig um kynferðisbrot og gerði samtökin ótrúverðug í umræðum um slík mál. Í kjölfar fréttarinnar hefur stjórn KÍ ákveðið að funda um mál Ragnar Þórs.

Verið hrottalega heiðarlegur um málið

Þessum skýringum, rétt eins og fundarboðinu, hafnar Ragnar Þór í pistli sem hann birti á bloggsíðu sinni í gærkvöldi. Ekkert nýtt hefði komið fram í viðtalinu á Vísi um helgina og að hann neiti þessum ásökunum ennþá staðfestlega. Hann hafi þar að auki verið „hrottalega heiðarlegur“ um þetta mál allt frá því að það kom upp fyrir um fjórum árum síðan.

Sjá einnig: Frambjóðendur til varaformanns KÍ lýsa yfir vantrausti á Ragnar Þór

„Ég tilkynnti stjórn KÍ um kæruna þegar hún kom fram fyrir tæpum fjórum árum. Þar á bæ hafa menn vitað að ég var kærður fyrir blygðunarsemisbrot árum saman. Stjórn KÍ hefur meira að segja fundað um það einu sinni,“ útskýrir Ragnar Þór á bloggi sínu og bætir við að þau sem tilkynntu um framboð sín hafi að sama skapi verið meðvituð um ásakanirnar. Hann hafi til að mynda sagt frá þeim þegar hann bauð sig fram. „Það getur því ekki verið það að ég skyldi verða fyrir slíkri ásökun sem skyndilega skapar gerbreytta stöðu.“

Í færslu sinni segir hann marga kennara vera sakaða um einelti, ofbeldi eða áreitni.

„Nú er því haldið fram í alvöru að sá sem verði fyrir slíkri ásökun sé þar með ógjaldgengur í æðstu embætti félagsins. Ég er algjörlega ósammála því. Af prinsippástæðum. Kennarasamband Íslands er ekki auglýsingastofa eða stjórnmálaflokkur. Starf þess á að byggja á grundvallarreglum og heiðarleika.“

Hafa pólitískan hag af málinu

Hann segir það „köld skilaboð til þeirra tuga eða hundruða kennara sem eru í sömu eða svipaðri stöðu og ég,“ að geta ekki öðlast frama eftir að vera sakaðir „um eitthvað.“

„Ég held að það sé kominn tími á heiðarlegri forystu í KÍ. Að minnsta kosti heiðarlegri en svo að menn þykist mjög hissa og skelli á neyðarfundum vegna frétta sem þeir fengu fyrir fjórum árum en hafa ekki haft pólitískan hag af að blása upp fyrr en nú,“ segir Ragnar Þór en blogg hans má nálgast hér.