Guðlaug verður skólastjóri Árbæjarskóla

Guðlaug Sturlaugsdóttir hefur verið ráðin skólastjóri við Árbæjarskóla. Guðlaug tekur við starfinu af Þorsteini Sæberg.

Guðlaug Sturlaugsdóttir hefur lokið M.Ed. gráðu í uppeldis- og menntunarfræði frá Háskóla Íslands, diplomu í uppeldis- og kennslufræðum með áherslu á stjórnsýslu og skólastjórnun og diplomu í uppeldis- og kennslufræðum með áherslu á upplýsingatækni.

Hún hefur um áratugaskeið starfað sem kennari og þá starfaði hún einnig um skeið sem skólastjóri við Grunnskóla Seltjarnarness. Þá hefur hún gegnt starfi skrifstofustjóra grunnskólaskrifstofu á skóla- og frístundasviði síðastliðin tvö ár.

Guðlaug tekur við starfinu um áramótin. Fjórir umsækjendur voru um skólastjórastöðuna í Árbæjarskóla, en umsóknarfrestur rann út 6. nóvember.