Murray og Williams munu keppa á Opna ástralska

Serena Williams og Andy Murray munu snúa aftur á tennisvöllinn í janúar. Þetta sagði framkvæmdarstjóri Opna ástralska risamótsins, Craig Tiley.

Murray, sem situr í þriðja sæti heimslistans, hefur ekki spilað síðan í júlí vegna meiðsla á mjöðm.

Hin 36 ára Serena Williams, sem er ein sigursælasta tenniskona sögunnar, eignaðist sitt fyrsta barn nú í september.

„Allir bestu tenniskapparnir verða komnir til baka í Melbourne,“ sagði Tiley.

„Ég hef talað við Murray og hann ætlar sér að eiga frábært ár 2018.“

Williams gaf út áður en hún átti dóttur sína að hún ætlaði sér að vera komin til baka fyrir Opna ástralska, en hún vann mótið í fyrra.

„Hún vill koma til baka og verja titil sinn,“ sagði Craig Tiley.

Hann á einnig von á því að efsti maður heimslistans, Novak Djokovic, verði kominn þangað en hann hefur verið að glíma við meiðsli í olnboga.