Ólafur markahæstur allra á vellinum

Íslendingaliðið Kristianstad er enn með fullt hús í sænska handboltanum eftir risasigur, 33-19, á Lugi í kvöld.

Meistarar Kristianstad stýrðu ferðinni frá fyrstu mínútu og unnu sinn fimmta sigur í röð.

Ólafur Andrés Guðmundsson var markahæstur á vellinum með sjö mörk fyrir Kristianstad í tíu skotum. Hann lagði einnig upp eitt mark.

Gunnar Steinn Jónsson skoraði tvö mörk úr fimm skotum og gaf þrjár stoðsendingar. Arnar Freyr Arnarsson var svo með eitt mark af línunni.