Ekið í veg fyrir mótorhjól við Melatorg

Ekið var í veg fyrir mótorhjól við Melatorg á Hringbraut í Reykjavík á áttunda tímanum í kvöld. Ökumaður móthorhjólsins var staðinn upp þegar sjúkrabíll kom á staðinn en var þó fluttur á slysadeild, að sögn varðstjóra hjá slökkviliðinu á höfuðborgarsvæðinu.

Ein bifreið átti hlut að máli í kvöld en ökumaður hennar ók í veg fyrir ökumann mótorhjólsins við hringtorgið Melatorg sem stendur á mótum Suðurgötu og Hringbrautar í Vesturbæ Reykjavíkur.

Ökumaður mótorhjólsins datt af hjólinu en var uppistandandi þegar sjúkrabíll kom á staðinn, að sögn Bernódusar Sveinssonar, varðstjóra hjá slökkviliðinu á höfuðborgarsvæðinu. Ökumanninum var einum ekið á sjúkrahús vegna slyssins en meiðsl hans eru talin minniháttar.