Skátarnir sem veiktust allir útskrifaðir

Allir þeir sem veiktust af nóroveiru á útilífsmiðstöð skáta á Úlfljótsvatni hafa nú verið útskrifaðir úr fjöldahjálparstöðinni í Hveragerði og henni lokað. Þetta kemur fram í tilkynningu frá lögreglunni á Suðurlandi.

Unnið er að sótthreinsun grunnskólans í Hveragerði þar sem fjöldahjálparstöðinni var komið upp. Eru vonir sagðar standa til að þeirri vinnu ljúki eigi síðar en á morgun.

„Fulltrúar viðbragðsaðila funduðu í Hveragerði kl. 10:00 og munu taka saman greinargerð um aðkomu síns fólks og aðgerðir sem farið verður yfir á fundi í byrjun september. Lögreglan á Suðurlandi og umdæmislæknir sóttvarna í héraði vilja þakka viðbragðsaðilum öllum frábæra og óeigingjarna vinnu við þetta stóra verkefni,“ segir í tilkynningunni sem birtist á Facebook-síðu lögreglunnar.