Segir niðurstöðuna sigur fyrir Vestmannaeyjar

Elliði Vignisson, bæjarstóri í Vestmannaeyjum, fagnar nýveittri heimild samgönguráðuneytisins til siglinga ferjunnar Akraness milli lands og Eyja á Þjóðhátíð um helgina. Hann segir heimildina þýða að hátt í þúsund miðar verði seldir aukalega á hátíðina. Enn hefur þó ekki fengist úr því skorið hvað gert verður í málum farþega sem áttu pantað far með ferjunni á milli Reykjavíkur og Akraness um verslunarmannahelgina.

Í úrskurði ráðuneytisins, sem gefinn var út í dag, segir að Samgöngustofa hafi ekki sýnt fram á að aðstæður til siglinga milli Vestmannaeyja og Landeyjahafnar séu aðrar en á milli Reykjavíkur og Akraness. Því hefur verið lagt fyrir Samgöngustofu að fallast á umsókn Eimskips um að nota ferjuna til þessara siglinga dagana 4. og 7. ágúst næstkomandi.

„Þúsund miðar í viðbót til sölu“

„Þetta er sannarlega sigur fyrir okkur. Hann kemur kannski ekki mikið á óvart, okkur leið strax vel með þá ákvörðun að kæra þennan úrskurð. Við erum í þeirri stöðu að þurfa stöðugt að vera að verja með kjafti og klóm byggð og lífsforsendur í Vestmannaeyjum,“ segir Elliði Viginsson, bæjarstjóri í Vestmannaeyjum, í samtali við Vísi en hann er að vonum ánægður með niðurstöðuna.

Inntur eftir því hvort hann búist við að gestir fjölmenni á Þjóðhátíð með Akranesi segir Elliði að skipið gæti bætt rækilega í hóp þeirra sem sækja hátíðina.

„Ég veit sem er að fólk fjölmennir á Þjóðhátíð. Þetta þýðir einfaldlega að það verða, mér liggur nærri að segja, þúsund miðar í viðbót til sölu.“

Hann vonast til þess að niðurstaðan verði liður í því að bæta samgöngur til Vestmannaeyja.

„Þetta er góður upptaktur að góðri helgi. Nú er þetta að baki og ekki þarf að dvelja við þetta.“ Þá gerir Elliði ráð fyrir að skipið verði komið til þjónustu á föstudag nú þegar heimildin er fengin.

Óvíst hvað gert verður í málum farþega frá Reykjavík til Akraness

Ekki hefur þó enn fengist úr því skorið hversu tíðar siglingar Akraness verða á milli lands og Eyja um helgina.

Þá er heldur ekki vitað hvað verður gert í málum farþega, sem áttu pantað far með Akranesi frá Reykjavík til Akraness um helgina, ef af Eyjasiglingunum verður. Sæferðir Eimskip, rekstraraðili skipsins Akraness, var enn með málið í skoðun þegar blaðamaður Vísis náði samband við fyrirtækið um hádegi í dag og hafði ekki komist að niðurstöðu.