Búið að kæra niðurstöðuna í bardaga Gunnars og Ponzinibbio

Haraldur Dean Nelson, faðir Gunnars Nelson, staðfesti við Vísi í morgun að það væri formlega búið að kæra úrslitin í UFC-bardaga Gunnars gegn Argentínumanninum Santiago Ponzinibbio.

„Við erum búnir að senda inn kæru til UFC og viljum að úrslitum bardagans verði breytt vegna þess að sá sem vann braut ítrekað á andstæðingi sínum. Við viljum að niðurstöðunni verði breytt í „no contest“ eða engin úrslit. Úrslitin verði ógild,“ segir Haraldur Dean en það er teymi Gunnars sem kærir niðurstöðuna.

„Við viljum að UFC rannsaki þetta mál ofan í kjölinn. Ekki bara þennan bardaga heldur framgöngu Ponzinibbio í öðrum bardögum en þetta var mjög gróft hjá honum í Glasgow. UFC er með margar vélar og á að geta skoðað þetta frá mörgum hliðum.

„John Kavanagh þjálfari Gunnars er í Las Vegas og mun fylgja þessu máli eftir þar. Audie Attar umboðsmaður fór frá LA til Vegas til að ræða við UFC,“ segir Mjölnismaðurinn en Haraldur segist gera sér grein fyrir því að líkurnar á að þessum úrslitum verði breytt séu litlar sem engar.

„Það er ekki hefð fyrir því en við teljum að brotin þarna séu svo gróf og hættuleg að UFC eigi að svara þessu af fullri hörku. Senda um leið skilaboð að svona hlutir verði ekki liðnir innan sambandsins.“

Þetta var ekki sigur

Haraldur segir að það verði erfitt að sanna að brotið hafi verið viljandi gegn Gunnari en sönnurgögnin séu til staðar.

„Menn bera ábyrgð á sínum brotum. Er rétt að gefa manni frammistöðubónus fyrir framkomu af þessu tagi? Það verða menn að meta hver fyrir sig. Ef þú vinnur með svindli áttu þá að vera verðlaunaður sérstaklega fyrir það? Mitt svar er auðvitað nei. Þvert á móti á að ávíta menn fyrir það. Það á að taka af þér sigurinn. Þetta var ekki sigur.“

Eins og kunnugt er þá potaði Ponzinibbio að minnsta kosti þrisvar sinnum í augu Gunnars og í fyrsta skiptið fór hann mjög kröftuglega í bæði augu Gunnars. Eftir það sá hann tvöfalt og missti fjarlægðarskynið. Fyrir vikið náði Ponzinibbio yfirhöndinni og kláraði bardagann.

„Um leið og við komum inn í búrið eftir bardagann þá segir Gunni að hann hafi átt að stoppa bardagann því hann sá ekki neitt. Ég sá Gunna strjúka úr auganu á sér er það var farið fyrst í það,“ segir Haraldur.

Dómarinn stóð sig ekki

Fyrir bardagann kom dómarinn, Leon Roberts, inn í búningsherbergi til bardagakappanna. Hann ræddi sérstaklega tvö atriði. Annað þeirra var að um áramótin voru teknar í notkun nýjar reglur um útglennta fingur.

„Hún segir að þegar bardagakappar standa þá er þeim bannað að fara með opinn lófa og útglennta fingur í átt að andliti andstæðings. Það hefur auðvitað alltaf verið bannað að pota í augu en þetta eru strangari reglur. Dómarinn sagði að ef þeir færu svona með opna hendi í átt að andstæðingi myndi hann aðvara og síðan draga stig af viðkomandi ef hann héldi því áfram,“ segir Haraldur.

„Í fyrstu árás Gunnars þá slengir Ponzinibbio fingrunum af krafti í bæði augu Gunnars. Það sést vel á myndum meðal annars. Þá fer Gunnar að sjá tvöfalt og fær verki í augun. Gunnar sagðist aldrei hafa upplifað svona áður og fjarlægðarskynið fór líka út um gluggann. Leikur Gunna byggist á þessu fjarlægðarskyni.“

Kann hann ekki að kreppa hnefann

Gunnar viðurkenndi eftir bardagann að hann hefði átt að kvarta strax í upphafi. Það þýðir ekki að dómarinn hefði stöðvað bardagann en Gunnar sá eftir því engu að síður að hafa ekki kvartað.

„Þetta gerðist eftir 20 sekúndur og 26 sekúndum síðar fer Ponzinibbio aftur með puttana í andlitið á honum. Það leynir sér ekki að hann er með útglennta fingur. Þetta á vera heimsklassaboxari en kann hann ekki að kreppa hnefann? Hvaða stíll er það? Þetta er bannað og nýbúið að fara yfir það. Þú rotar engan svona og því spyr maður hver meiningin er með þessu? Eftir að hafa skoðað þetta oft þá get ég ekki annað sagt en að það bendi allt til þess að hann geri þetta viljandi.“

Í lok bardagans þegar Argentínumaðurinn er með Gunnar upp við búrið fer hann enn eina ferðina með puttana í augun á honum.

„Gunni fær krók í andlitið en fer frá honum. Þá grípur hann í buxurnar á honum og togar þær út. Enn segir Roberts dómari ekki neitt. Svo þegar þeir koma upp við búrið þá fer hann aftur í augað á honum. Af hverju er hann með puttana í auganu á Gunnari upp við búrið þegar hann ætlar að kýla hann? Hann reif augað á Gunnari þarna til hliðar og engin aðvörun frá dómaranum. Gunnar hefur engan tíma til að kvarta því hann liggur í gólfinu tveimur sekúndum síðar.

„Þetta er gríðarlega alvarlegt mál því hann hefði getað blindað Gunnar og endað feril hans. Það er ástæða fyrir því að þessi nýi regla var sett inn. Menn voru að hafa áhyggjur af þessu augnpoti og afleiðingum þess. Þetta er sett inn til þess að styðja við mikilvægustu regluna í MMA frá upphafi sem er að það má ekki pota í augu andstæðings.“