Rafmagnskapall brann yfir í álverinu í Straumsvík

Slökkvilið höfuðborgarsvæðisins var kallað út á þriðja tímanum í dag þar sem tilkynnt hafði verið um eld í álverinu í Straumsvík.

Allt tiltækt lið var sent á staðinn en þegar fyrstu bílar komu á vettvang kom í ljós að engin hætta væri á ferðum og voru þá bílar sendir til baka sem voru á leiðinni á staðnum.  

Samkvæmt upplýsingum frá slökkviliðinu brann rafmagnskapall yfir sem var líklega skemmdur. Nokkur reykur var á staðnum en enginn sjáanlegur eldur. Slökkviliðið reykræsti og er vinnu nú lokið á vettvangi.