Safna fyrir fjölskyldu unga mannsins sem lést í slysi á Selfossi

Aðstandendur fjölskyldu Bjarka Más Guðnasonar, sem lést í slysi á Selfossi í síðustu viku, hafa komið af stað söfnun fyrir fjölskylduna. Vinkona móður Bjarka, sem stendur að framtakinu, segir söfnunina til þess gerða að létta undir með fjölskyldunni en gríðarlegur kostnaður getur fylgt láti ástvinar.

Bjarki Már var á nítjánda aldursári þegar hann lést í slysi á gámasvæðinu á Selfossi á þriðjudag í síðustu viku. Bifreið á svæðinu féll af tjakki og ofan á Bjarka sem var undir bifreiðinni. Hann var endurlífgaður á vettvangi og fluttur með þyrlu Landhelgisgæslunnar á bráðamóttöku Landspítalans í Fossvogi en var úrskurðaður látinn á föstudag.

„Það minnsta sem maður getur gert er að veita smá peningaaðstoð“

Anna Karen Vigdísardóttir er vinkona móður Bjarka Más en maður hennar er auk þess bróðir stjúpföður hans. Anna Karen hleypti af stað söfnun fyrir fjölskylduna í kjölfar slyssins vegna mikils kostnaðar sem fylgir andláti ástvinar.

„Þetta er ólýsanlegt og þetta er bara það versta sem getur komið fyrir foreldra. Það er mjög erfitt að horfa upp á þau, foreldrana, í þessum aðstæðum,“ segir Anna Karen í samtali við Vísi.

„En maður sér auðvitað hvað er fátt hægt að gera. En það minnsta sem maður getur gert er að veita smá peningaaðstoð. Það er bara ótrúlegur kostnaður sem fylgir þessu.“

Finna fyrir miklum stuðningi á Selfossi

Anna Karen hefur ekki stofnað sérstakan styrktarreikning heldur leggst peningurinn sem safnast beint inn á reikning móður Bjarka Más. Þá segir Anna Karen að fjölskyldan hafi fundið fyrir miklum stuðningi á Selfossi í kjölfar slyssins en áfallið hefur reynst öllum aðstandendum þungbært.

„Hann átti fullt af vinum sem vilja gera allt í heiminum til þess að létta þeim lífið en annars er ekkert hægt að segja, þetta eru bara svolítið þannig aðstæður. Foreldrarnir eru náttúrulega bara ótrúlega ungir, hún er bara 18 ára þegar hún eignast hann. Það bara eru engin orð,“ segir Anna Karen.

„Slysin geta gerst alls staðar og ég held að þetta kenni fólki að lífið getur verið mjög stutt.“

Þeim sem vilja styrkja fjölskyldu Bjarka Más er bent á reikning söfnunarinnar sem Anna Karen deildi á Facebook-síðu sinni í dag. Allur peningur leggst inn á reikning 0189-26-6500 með kennitölu 151280-4719.