KR vann í Finnlandi og mætir Viðari Erni og félögum í næstu umferð

KR er komið áfram í 2. umferð forkeppni Evrópudeildar UEFA í fótbolta eftir glæsilegan 2-0 sigur á SJK Seinäjoen frá Finnlandi í seinni leik liðanna sem fram fór ytra í dag.

Fyrri leik liðanna lauk með markalausu jafntefli í vesturbænum þar sem KR var miklu betra liðið en í dag tókst lærisveinum Willums Þórs Þórssonar að nýta færin og koma sér örugglega áfram.

Markalaust var í hálfleik en Pálmi Rafn Pálmason kom KR yfir á 51. mínútu og danski framherjinn Tobias Thomsen gulltryggði sigurinn í leiknum og í einvíginu með öðru marki gestanna á 83. mínútu.

KR mætir næst ísraelska stórliðinu Maccabi Tel Aviv en með því leikur íslenski landsliðsframherjinn Viðar Örn Kjartansson sem var markakóngur í ísraelsku deildinni á síðustu leiktíð.

Fyrri leikurinn fer fram í Ísrael 13. júlí en sá síðari á Alvogen-vellinum 20. júlí.

FT: SJK 0-2 KR

KR fer til Ísrael og mætir Maccabi Tel Aviv

Ertu klár @Vidarkjartans ?#AllirSemEinn

— KR Reykjavik FC (@KRreykjavik) July 6, 2017