Þrír til viðbótar sýknaðir af ákæru um hatursorðræðu

Héraðsdómur Reykjavíkur sýknaði á föstudag þrjá menn af ákæru um hatursorðræðu, en þeir voru allir ákærðir fyrir ummæli sem þeir létu falla í tengslum við hinsegin fræðslu í grunnskólum í Hafnarfirði.

Lögreglustjórinn á höfuðborgarsvæðinu gaf út ákærur á hendur átta manns í apríl í fyrra sem vörðuðu ummæli sem látin voru falla á opinberum vettvangi og tengdust hinsegin fræðslunni. Tveir voru sýknaðir af slíkum ákærum í síðasta mánuði; þeir Jón Valur Jensson og Pétur Gunnlaugsson.

Í ákærunum voru ummælin sögð innihalda háð, rógburð og smánun á opinberum vettvangi í garð ótiltekins hóps manna hér á landi vegna kynhneigðar og kynvitundar þeirra.

Prestar eigi að sinna ákveðnu hlutverki

Einn þessara manna, sem er prestur, var ákærður fyrir eftirfarandi ummæli sem skrifuð voru á Facebook:

„Hlutlausa kynfræðslu á veita í skólum en ALDREI réttlæta ónáttúrulega kynhegðan fyrir saklausum börnum og kalla það sem er óeðlileg eðlilegt!!!“

Hann neitaði sök fyrir dómi, en viðurkenndi að hafa skrifað og birt umrædd ummæli. Hann sagðist hafa, sem prestur, verið reiður eftir að prestum og trúnni hafi verið hent út úr skólum bæði í Reykjavík og Hafnarfirði.

Skýrði hann það álit sitt að prestar ættu að sinna ákveðnu hlutverki en tók fram að honum væri ekki í nöp við samkynhneigða. Hann hafi aðeins beint sjónum sínum að bæjarstjórninni og hinsegin fræðslunni. Þá vilji hann leyfa börnum að vera börn þar til þau væru komin undir tólf ára aldur og að kynfræðsla eigi að vera hlutlaus.

„Ógeðslegt"

Annar maður var ákærður fyrir skrif sín inni á athugasemdakerfi Vísis við frétt um hinsegin fræðsluna, en ummæli hans voru eftirfarandi:

„Við hlustendur útvarps Sögu kærum okkur ekki um neinar fjandans útskýringar Óskars Steins á þessari kynvillu. Þetta er ógeðslegt. Að innræta í börn hvernig kynvillingar eðla sig í rúminu. Óskar Steinn getur þess vegna setið heima hjá sér heldur en að troða sér inn á útvarp Sögu. Þvílíkt ógeð.“

Hann neitaði sök en viðurkenndi að hafa skrifað ummælin, sem vörðuðu Óskar Stein Ómarsson, ritara Samfylkingarinnar og formann Ungra jafnaðarmanna í Hafnarfirði.

Sagðist maðurinn hafa haft áhuga á málefninu og tekið þátt í skoðanaskiptum og skrifað um þetta þar sem hann hafi verð ósáttur. Ekki hafi hann reiknað með því að ummæli hans hefðu þau áhrif sem lýst er í ákæru, þ.e að um sé að ræða háð, rógburð eða smánun.

„Allir japlandi á typpasleikjóum"

Sá þriðji skrifaði eftirfarandi færslu á Facebook:

„Hvar væri þjóðin ef ekki væri fyrir þig? Allir labbandi í G streng og japlandi á typpasleikjóum. Það þarf bara að gera þessa klámkalla að tunnumönnum á öfuguggatogara. Þessi yfirvöld eru á villigötum. Það tekur annar hver maður í dag trollið inn að aftan!“

Þriðji maðurinn neitaði jafnframt sök. Hann kvað ummælin frá sér komin og sagði að tilefni þeirra ætti rætur að rekja til atburðar sem átti sér stað í gleðigöngunni árið áður.

Þá hafi skrif hans verið stuðningur við opna umræður sem eigi alltaf rétt á sér hvort sem hún væri sanngjörn eða ósanngjörn og að hluti skrifanna hafi verið líkindamál.

Opinber umræða hafi iðulega í för með sér óþægindi

Einn og sami dómarinn var í málunum þremur, Guðjón St. Marteinsson, en hann segir í niðurstöðu sinni að opinber umræða um hvað eina í lýðræðisþjóðfélagi hafi iðulega í för með sér ýmiss konar óþægindi fyrir einstaklinga og eða hópa fólks.

„Fólk móðgast, hneykslast eða reiðist, telur á sig hallað, telur á sér brotið og svo framvegis. Þetta er óhjákvæmilegur fylgifiskur opinberrar umræðu í lýðræðisþjóðfélagi,” segir Guðjón.

Mat hann það þar af leiðandi sem svo að gegn eindreginni neitun sé ósannað að mennirnir hafi haft ásetning til að hafa ásetning til að hafa þau áhrif með skrifum sínum sem lýst er í ákærunni.