Tók metið í starfi Sigurðar

Keflvíkingar eru heldur betur búnir að finna sjálfa sig á ný inn á körfuboltavellinum og þeir geta þakkað Njarðvíkingnum Friðriki Inga Rúnarssyni fyrir það.

Keflavík hefur unnið sex af átta leikjum sínum síðan að Friðrik tók við liðinu og Keflvíkingar sjá nú langþráð sæti í undanúrslitum í hillingum.

Keflavík er komið í 2-0 í einvígi sínu á móti Tindastól og fær þrjá nú þrjá leiki til þess að tryggja sér sæti í undanúrslitunum í fyrsta sinn í sex ár. Keflavík sem komst í tíu undanúrslit af ellefu mögulegum frá 2001 til 2011 hefur dottið út úr átta liða úrslitunum undanfarin fimm ár. Þeir sem höfðu áhyggjur af því að þjálfaraferill Friðriks Inga Rúnarssonar væri á enda runninn eftir að hann hætti óvænt með Njarðvíkurliðið síðasta vor, þurfa ekki að hafa neinar áhyggjur af því í dag.

Fann fjórða og fimmta gírinn

Friðrik Ingi lítur nú út eins og endurfæddur maður á hliðarlínunni fullur af orku og eldmóði. Hann er jafnframt búinn að finna fjórða og fimmta gír Keflavíkurliðsins sem fundust ekki áður en hann mætti á Sunnubrautina.

Það hefur margt breyst í Keflavík síðan að Friðrik Ingi mætti á svæðið í bikarúrslitaleikjahléinu í febrúar. Keflavíkurliðið riðaði þá til falls eftir tvö töp í röð og sjö tapleiki frá því í nóvember. Þá sáu fáir glitta í lið sem var líklegt til að fara að berjast um titilinn seinna um vorið enda jafnlangt niður í fallsæti og í upp í sjöunda sætið.

Friðrik Ingi er ekki aðeins búinn að breyta gengi Keflavíkurliðsins svo um munaði heldur er hann búinn að gera Hörð Axel Vilhjálmsson að besta leikstjórnandanum í deildinni og gera Amin Stevens að óstöðvandi afli inn í teig. Hann er líka langt kominn með að enda sex ára bið Keflvíkinga eftir leik í undanúrslitum og um leið búinn að endurskrifa sögu úrslitakeppninnar.

Nú hefur Friðrik Ingi Rúnarsson tekið metið af Sigurði Ingimundarsyni yfir flesta sigurleiki þjálfara í úrslitakeppni og gerði það í starfinu hans Sigurðar en Sigurður vann næstum því alla leikina sem þjálfari Keflavíkur. Friðrik Ingi missti metið til Sigurðar í úrslitakeppninni 2009.

Átti metið í átta ár

Sigurðar var því búinn að eiga metið í átta ár en hann jafnaði Friðrik Inga þegar Keflavíkurliðið tryggði sér Íslandsmeistaratitilinn síðast vorið 2008. Lokaleikurinn var 58. sigurinn hjá liði undir stjórn Sigurðar í úrslitakeppni. Sigurður eignaðist metið einn ári seinna og hefur átt það þar til í ár.

Friðrik Ingi hefur þegar gert bæði Njarðvík (1991, 1998) og Grindavík (1996) að Íslandsmeisturum og nú velta margir því fyrir sér hvort að hann sé búinn að blanda í meistaralið í Keflavík. Fyrst á dagskrá er þó að ná þriðja sigrinum á móti Stólunum en næsti leikur er á Króknum á miðvikudagskvöldið.