FBI segir ekkert styðja ásakanir Trumps

James Comey, yfirmaður bandarísku alríkislögreglunnar FBI, segir að hvorki FBI né bandaríska dómsmálaráðuneytið hafi neinar upplýsingar sem geti staðfest ásakanir Donalds Trump forseta um að Barack Obama, forveri hans í embættinu, hafi látið hlera síma Trumps.

Comey staðfesti enn fremur að forseti Bandaríkjanna hafi enga heimild til að fyrirskipa hleranir.

Þetta sagði Comey í yfirheyrslum hjá leyniþjónustunefnd fulltrúadeildar Bandaríkjaþings.

Hann staðfesti einnig, í fyrsta sinn opinberlega, að hjá FBI stæði yfir rannsókn á því hvort einstaklingar á kosningaskrifstofum Trumps hefðu verið í tengslum við Rússland. Jafnframt væri rannsakað hvort lögbrot hefðu verið framin í kosningabaráttunni fyrir forsetakosningarnar á síðasta ári.

Michael Rogers, yfirmaður Þjóðaröryggisráðs Bandaríkjanna, var einnig í yfirheyrslu hjá sömu þingnefnd í gær. Hann sagðist þar sammála yfirlýsingum bresku leyniþjónustunnar um að það væri „algerlega fáránlegt“ og „tóm della“ að leyniþjónustan hefði tekið þátt í að hlera Trump.

Fréttin birtist fyrst í Fréttablaðinu.