Læknaráð lýsir yfir áhyggjum vegna Landspítalans

Stjórn læknaráðs Landspítala lýsir yfir áhyggjum af húsnæðismálum og umhverfi spítalans. Grípa verði til þjóðarátaks svo unnt verði að leysa þennan vanda með markvissari skipulagsvinnu innan heilbrigðiskerfisins í heild sinni ásamt auknum fjárveitingum.

Í ályktun ráðsins segir að mikið álag hafi verið á læknum og öðru starfsfólki Landspítalans ásamt viðvarandi og vaxandi skorti á sérhæfðu starfsfólki til hjúkrunar og rannsóknartengdrar þjónustu. Þessu til viðbótar berist fréttir af ónýtu og jafnvel heilsuspillandi rannsóknarhúsum sem starfsfólk hafi þurft að búa við á undanförnum árum.

Læknaráð telur of langt í að nýtt húsnæði verði tekið í gagnið, en áætlað er að það verði tekið í notkun árið 2023. Er því hvatt til þess að skipulagsvinnu, áætlunum, útboðum og framkvæmdum verði flýtt eins og kostur sé.

„Niðurstaða síðustu skoðunar á rannsóknarhúsum Landspítalans kallar jafnframt á skjót viðbrögð og auknar fjárveitingar til viðhalds og endurnýjunar á gömlu og úr sér gengnu húsnæði. Velferð og heilsa starfsmanna Landspítalans verða að vera í forgangi, ekki síður en aðbúnaður sjúklinga,“ segir í ályktun stjórnar læknaráðs.