Gjaldeyrir flæðir úr kistum þjóðarbúsins og krónan styrkist

Benedikt Jóhannesson fjármálaráðherra, Ragnar Þór Ingólfsson nýkjörinn formaður VR og Halldór Benjamín Guðbergsson framkvæmdastjóri Samtaka atvinnulífsins verða gestir Heimis Más Péturssonar fréttamanns í Víglínunni á Stöð 2 og Vísi í hádeginu í dag.

Á sama tíma og hirslur þjóðarbúsins eru smekkfullar af erlendum gjaldeyri þenur krónan sig þrátt fyrir afnám gjaldeyrishafta. Það veldur forystufólki útgerða og annarra útflutningsgreina krónískum höfuðverk og verðlagið á Íslandi ríkur upp þannig að erlendir ferðamenn súpa hveljur. Þetta og margt fleira verður rætt við fjármálaráðherra sem nú liggur undir felldi með Jóni Gunnarssyni samgönguráðherra til að hugsa upp leiðir til að bæta í framlög til uppbyggingar vegakerfisins í landinu.

Þá koma þeir Ragnar Þór Ingólfsson nýkjörinn formaður VR og Halldór Benjamín Þorbergsson framkvæmdastjóri Samtaka atvinnulífsins í Víglínuna til að ræða stöðuna á vinnumarkaði. Kjör Ragnars Þórs kom mörgum á óvart en hann hefur meðal annars allt aðra skoðun á mikilvægi SALEK samkomulagsins en flestir aðrir forystumenn aðila vinnumarkaðarins og vill endurskoða hlutverk lífeyrissjóðanna við uppbyggingu húsnæðiskerfisins í landinu.

Víglínan er í opinni dagskrá og í beinni útsendingu á Stöð 2 og Vísi klukkan 12:20.

Hægt er að horfa á hana í spilaranum hér fyrir ofan.