Hvar er fíni rassinn á Rondu eiginlega?

Derrick Lewis rotaði kærasta Rondu Rousey, Travis Browne, um helgina með stæl og sparaði ekki stóru orðin í kjölfarið.

Lewis var á persónulega nótunum og rifjaði upp umræður um meint heimilisofbeldi Browne og spurði svo eftir kærustunni hans.

„Ég vissi að ég væri með stærra hjarta en hann. Hann kallar sig mann en er samt fyrir að lemja konur. Gleymið þessum gaur. Ég er með miklu stærra hjarta en hann. Hvar er fíni rassinn á Rondu eiginlega,“ sagði Lewis í viðtalinu í búrinu en UFC kunni ekki að meta þessi ummæli um Rondu og klippti þau út síðar en lítið var hægt að gera við þessu í beinni útsendingu.

Heimilisofbeldismálið sem Lewis var að vitna til er frá sumrinu 2015 er fyrrverandi eiginkona Browne, Jenna Webb, setti mynd af sér á Instagram þar sem hún var öll marin og blá. Sagði hún að meiðslin væru eftir barsmíðar frá Browne.

Browne neitaði öllum ásökunum og Webb kærði aldrei. Browne var settur í bann hjá UFC meðan málið var í gangi en fékk að keppa aftur er í ljós kom að ekki yrði kært í málinu.

Lewis er núna búinn að vinna sex bardaga í röð og þar af hefur hann barist tvisvar á síðustu tveim mánuðum. Hann er þreyttur eftir bardagana og allt kynlífið sem hann er að stunda og ætlar í frí.

„Ég verð að hvíla mig núna. Ég vil ekki heyra minnst á bardaga í þrjá mánuði. Eftir allar þessar æfingar og allt kynlífið sem ég hef verið að stunda er kominn tími á að líkaminn fái að hvíla sig.“