Gefa pör saman í hverri sýningu

„Ég og Gígja Jónsdóttir unnum saman að dansleikhúsverkinu The drop dead diet en það fjallaði um nýjan megrunarkúr sem við bjuggum til. Það samstarf gekk svo vel að okkur langaði að taka þessa hugmynd lengra, það er baráttu mannsins við einhverja fullkomna ímynd sem samfélagið setur okkur. Því lá beinast við að færa sig frá hinum fullkomna líkama yfir í hina fullkomnu manneskju eins og hún leggur sig,“ segir Guðrún Selma Sigurjónsdóttir um verkið A guide to the perfect human sem verður frumsýnt í Tjarnarbíói 14. janúar.

„Verkið fjallar um hugmyndir okkar um hina fullkomnu manneskju og þær leiðir sem við notum til þess að reyna að verða sú manneskja. Verkið gerist í brúðkaupi og brúðkaupsveislu. Í veislunni spretta upp hinar ýmsu senur sem nálgast viðfangsefnið hin fullkomna manneskja frá mismunandi sjónarhornum. Þannig að fólk er bæði leikhúsgestir og gestir í raunverulegri brúðkaupsveislu.

Við Gígja semjum sýninguna og stjórnum henni en Loji Höskuldsson, höfundur tónlistarinnar, og Eleni, leikmynda- og búningahönnuður, taka mjög virkan þátt í sköpunarferlinu – við Gígja og Loji verðum á sviðinu. En þar sem við erum að vinna með skilin á milli raunveruleika og sviðsetningar þá komum við fram sem við sjálf í verkinu. Við verðum líka með tíu þjóna og fullt af leynigestum sem koma fram sem þeir sjálfir sem ákveðin birtingarmynd hinnar fullkomnu manneskju.“

Hvernig hefur ferlið gengið hjá ykkur?

„Það er komið eitt og hálft ár síðan hugmyndin kviknaði og rúmt hálft ár síðan við byrjuðum að vinna formlega að verkinu. Æfingaferlið hefur verið öðruvísi heldur en öll önnur listræn ferli sem við höfum farið í gegnum. Við erum með mikið af fólki í sýningunni sem þarf að leikstýra og semja hreyfingar fyrir og svo erum við líka í því að hanna matseðilinn og skipuleggja brúðkaup. Svo er það sýningin sjálf sem byggist upp að vissu marki á áhorfendunum og brúðkaupsgestunum þannig að þann hluta er ekki hægt æfa að fullu nema bara vera á tánum í sýningunni.“

Hvernig gekk að fá fólk til að vera með í sýningunni?

„Í hverri sýningu verður eitt par gefið saman og það gekk bara ótrúlega vel að fá fólk til að vera með. Við auglýstum eftir fólki í haust og fullt af fólki hafði áhuga. Að lokum voru þrjú ótrúlega hress og skemmtileg pör sem vildu taka þátt. Þau áttu það öll sameiginlegt að hafa verið saman í góðan tíma, langaði að taka stóra skrefið en vildu gera það á óhefðbundinn hátt og gripu þá þetta tækifæri.“

Verkið er styrkt af Reykjavíkurborg og mennta- og menningarmálaráðuneytinu og er sýnt í Tjarnarbíói 14., 20. og 21. janúar og hefjast allar sýningarnar klukkan sjö.