Danir í úrslitaleik gegn Rúmeníu um sæti í undanúrslitum

Dönsku stelpurnar misstu unninn leik gegn Rússum úr höndunum á sér á EM í kvöld. Niðurstaðan jafntefli, 26-26, í skrautlegum leik.

Danir misstu boltann í tvígang á lokamínútunni er þeir voru marki yfir. Dönsku stúlkurnar töldu sig líka vera komna með boltann er sjö sekúndur voru eftir af leiknum og Rússar tóku leikhlé. Umdeilt atvik en Rússar náðu ekki að skora úr lokasókninni.

Danska liðið er með 5 stig í milliriðli II og fer í úrslitaleik gegn Rúmeníu um laust sæti í undanúrslitum mótsins. Rúmenía er með stigi meira og dugar því jafntefli í leiknum. Rússar eiga aftur á móti ekki lengur möguleika á sæti í undanúrslitum.

Stine Jörgensen skoraði sjö mörk fyrir Dani í kvöld og Marina Sudakova skoraði sex fyrir Rússa.