Umfjöllun og viðtöl: Þór Þorl. - Stjarnan 77-94 | Stjörnumenn seinir í gang en áfram ósigraðir

Stjörnumenn héldu áfram sigurgöngu sinni í Domino´s deild karla í körfubolta í kvöld þegar þeir fögnuðu sautján stiga sigri í Þorlákshöfn.

Stjarnan vann Þórsliðið 94-77 þrátt fyrir að vera sextán stigum undir eftir fyrsta leikhlutann. Stjörnumenn eru eina ósigraða lið deildarinnar eftir sex umferðir.

Þórsliðið vann fyrsta leikhlutann 28-12 en Stjörnumenn svöruðu með því að vinna annan leikhlutann 33-15 og komast tveimur stigum yfir fyrir hlé, 45-43.

Stjörnuvélin var komin í gang og hélt áfram að malla í seinni hálfleiknum. Þórsarar héldu sér inn í leiknum en ekki mikið meira en það.

Þórsarar unnu Íslandsmeistara KR á útivelli í síðasta leik og þeir litu afar vel út í byrjun. Stjörnuliðið hefur lagt það í vana sinn að byrja illa í vetur en liðið sýndi styrk sinn þegar þeir komu sér aftur inn í leikinn og unnu sannfærandi sigur.

Hlynur Bæringsson var með 24 stig, 10 fráköst og 5 stoðsendingar í kvöld og Arnþór Freyr Guðmundsson skoraði 20 stig. Justin Shouse var með 17 stig og 6 stoðsendingar.

Þór Þ.-Stjarnan 77-94 (28-12, 15-33, 15-22, 19-27)

Þór Þ.: Tobin Carberry 22/11 fráköst, Maciej Stanislav Baginski 14/4 fráköst, Halldór Garðar Hermannsson 14, Emil Karel Einarsson 7/4 fráköst, Davíð Arnar Ágústsson 5/5 fráköst, Þorsteinn Már Ragnarsson 4, Ólafur Helgi Jónsson 4, Grétar Ingi Erlendsson 4, Ragnar Örn Bragason 3.

Stjarnan: Hlynur Elías Bæringsson 24/10 fráköst/5 stoðsendingar, Arnþór Freyr Guðmundsson 20, Justin Shouse 17/6 stoðsendingar, Tómas Heiðar Tómasson 16, Devon Andre Austin 11/7 fráköst, Eysteinn Bjarni Ævarsson 4, Marvin Valdimarsson 2.

Af hverju vann Stjarnan?

Stjörnumenn komu rétt stilltir inn í annan leikhluta og breyttu stöðunni úr 28-12 heimamönnum í vil yfir í 43-45 þeim í vil. Það var allt annað að sjá til þeirra í öðrum leikhluta.

Leikmenn Stjörnunar voru sjóðheitir í öðrum leikhluta og héldu þeir því áfram í seinni hálf leik. Þeir kláruðu leikinn hægt og rólega í seinni hálfleik með góðri vörn og góðum skotum sem voru að rata ofan í.

Stjarnan sýndi í kvöld með þessum sterka útivallarsigri að það er ástæða af hverju margir segja að þeir verði deildarmeistarar. Þeir sýndu frábæran karakter á seinustu 30 mínútunum og þannig kláruðu þeir þennan leik sem þýðir það að þeir eru komnir með sex sigra af sex mögulegum.

Bestu menn vallarins:

Bestu menn vallarins voru allir bláklæddir. Hlynur Bæringsson sýndi það enn og aftur af hverju hann er lykilleikmaður í landsliðinu með því að skora 24 stig, vera með 10 fráköst og spila hörku vörn.

Arnþór Freyr, eða Addú eins og hann er kallaður, var frábær í kvöld. Addú setti 6 þrista í 8 tilraunum og voru þeir allir risa stórir.

Justin Shouse skilaði sínu í kvöld eins og hann gerir nánast undantekningalaust. Justin var með 17 stig og stýrði hann leiknum mjög vel í kvöld.

Hvað gekk illa?

Fyrsti leikhluti var algjörlega frábær hjá heimamönnum enn svo virtist lítið sem ekkert ganga upp hjá þeim í hinum þrem leikhlutunum.

Hittnin fór úr því að vera algjörlega frábær yfir í að vera mjög slöpp og var það eitt af lykilatriðunum í þessu tapi hjá Þórsurum.

Sömu hluti má segja um vörnina hjá heimamönnum, hún byrjaði vel en endaði illa rétt eins og skotnýtingin.

Hrafn: Ánægðastur með þennan sigur

Hrafn Kristjánsson, þjálfari Stjörnunar, var ánægður með sigurinn í dag og einnig mjög ánægður með hvernig þeir eru búnir að byrja tímabilið.

„Það er frábært að vera kominn með sex sigra, ég er samt ánægðastur með þennan sigur þótt við byrjuðum illa. Mér fannst varnaleikurinn í seinustu þrem leikhlutunum vera stórkostlegur,“ sagði Hrafn við Vísi.

Hrafn var ánægður með þennan sigur vegna þess hversu mikilvægur sigur var fyrir restina af tímabilinu.

„Það var alveg vitað eins og deildin er búin að spilast þá var þessi leikur ásamt næsta leik mjög stórir fyrir baráttuna um deildarmeistartitilinn. Við fáum Tindastól í heimsókn í næsta leik og er sá leikur mjög stór og við einbeitum okkur bara að honum núna,“ sagði Hrafn.

Einar Árni: Maður er aldrei ánægður með að tapa

Einar Árni Jóhannsson, þjálfari heimamanni, var ekki sáttur með að tapa leiknum en sá samt jákvæða punkta hjá hans mönnum í þessum leik.

„Maður er aldrei ánægður með að tapa, eins og við vorum ánægðir með fyrsta leikhlutann og hvernig við spiluðum í honum þá gáfum við þeim alltof mikið svigrúm í öðrum leikhluta og þeir fara að hitta,“ sagði Einar.

Heimamenn leiddu með 16 stigum í fyrsta leikhluta en töpuðu því niður í öðrum.

Einari fannst vörnin hjá gestunum vera frábær og gerðu Stjörnumenn Þórsurum lífið leitt á vallarhelmingi Stjörnumanna.

„Eins vel og við vörðumst í fyrsta leikhluta þá mega þeir eiga það að þeir spiluðu frábæra vörn hérna síðustu 30 mínútunar og vinna bara verðskuldaðan sigur,“ sagði Einar, um tapið í kvöld.

Arnþór Freyr: Ég var bara réttur maður á réttum stað

Arnþór Freyr Guðmundsson, Addú, leikmaður Stjörnunar var ánægður leik liðsins og líka leik sinn í kvöld. Addú var frábær í kvöld og skoraði hann 20 stig, 18 af þeim komu úr þriggja stiga skotum.

„Þetta hefði getað verið hver sem er hjá okkur sem hefði setti alla þessa þrista niður en ég var bara réttur maður á réttum stað. Þegar boltinn gengur svona vel hjá okkur þá erum við að fá fullt af opnum skotum og það er sama hver er inn á hjá okkur við getum alltaf sett þessi opnu skot,“ sagði Addú um leik hittni sína í kvöld.

Arnþór skilur ekki alveg hvað gerðist í byrjun leiks og skilur ekki alveg af hverju þeir mæta stundum bara ekki í leikinn í strax í byrjun.

„Ég skil ekki alveg af hverju við mætum ekki klárir í suma leiki og er þetta klárlega eitthvað sem við þurfum að laga og bæta okkur í,“ sagði hann.

„Mér finnst við vera byrja illa í en leið og við náum að koma okkur í gang þá finnst mér þetta ganga mjög vel hjá okkur,“ sagði Arnþór Freyr eftir leikinn í kvöld.