Kennarar sætta sig við 600-700 þúsund krónur í mánaðarlaun

Kennarar telja eðlilegt að laun þeirra séu á bilinu sex til sjö hundruð þúsund krónur. Mikill hiti er í stéttinni vegna kjaramála og krefjast kennarar tafarlausra breytinga. Samstöðufundur grunnskólakennara var haldinn í troðfullu Háskólabíói í dag.

Nemendur í sjöunda bekk Melaskóla urðu ekki mikið vör við það að kennarar ætluðu sér að ganga út frá störfum sínum í dag enda lauk kennslu skömmu áður en kennarar gengu fylktu liði frá skólanum og yfir í Háskólabíó þar sem grasrót kennara hafði boðað til samstöðufundar vegna kjarabaráttu þeirra.

Troð fullt var út úr dyrum og þurfum margir að standa í anddyri Háskólabíós og fylgjast þar með ræðuhöldum.

„Það er löngu kominn tími til þess að það sé hlustað á okkur. Að mark sé tekið á kröfum okkar í kjaramálum. Núna verður það að gerast. Hversu oft höfum við kennarar ekki látið beygja okkur þegar kjaramál okkar eru annars vegar. Við erum búin að selja allt nema kennarastólana undan okkur,“ sagði Sigrún Björk Cortes, kennari, í ræðu sinni á samstöðufundinum í dag.

Fyrsti samningafundur kennara við sveitarfélögin hjá Ríkissáttasemjara var haldin í gær og næsti fundur er boðaður á morgun en ljóst er að samninganefndirnar fá ekki langan tíma til þess að  leggja fram nýjan kjarasamning.

En hvað ætli kennarar myndu sætta sig við í mánaðarlaun?

„Ætli lágmarkslaun séu ekki  allavega 600 þúsund...lágmarks,“ sagði Stefanía Ósk Þorsteinsdóttir, kennari við Lágafellskóla.

„Ég vill fá nokkuð góða launahækkun til þess að geta haldið áfram,“ sagði Helga Sveinsdóttir, kennari við Rimaskóla.

„Ég yrði alveg ágætlega sátt við 600-700 þúsund. Maður er núna rétt með helminginn af því,“ sagði Þórunn Grétarsdóttir, kennari við Öldutúnsskóla. 

Hópur kennara hélt svo af samstöðufundinum og yfir í Hagaskóla þar sem borgarstjórn var með fund og vildu þannig koma kröfum sínum betur á framfæri við borgarstjóra.

Nýlega kynnti Reykjavíkurborg betri afkomu borgarinnar og spurningin er mun það skila sér í launaumslag kennara í Reykjavík?„Við bættum við peningum í skólanna í haust,“ sagði Dagur B. Eggertsson, borgarstjóri.

En þeir skila sér ekki í launin?

„Nei, nei, ekki nema það semjist og þess vegna höfum við og ég beint áskorunum bæði til forystu sambands íslenskra sveitarfélaga og kennara að það verði að nást saman. Ég held að allir átti sig á því að þessi staða sem er í skólanum er ekki góð fyrir skólastarfið þegar til lengri tíma er litið og við erum þess albúin hér í Reykjavík að hefja nýja sókn í skólamálum en á meðan þessi kjaramál eru óleyst að þá yfirskyggir það annað því miður, sagði Dagur.