Flóttamaðurinn sem er nú byrjunarliðsmaður í þýsku úrvalsdeildinni

Saga Ousman Manneh er engri lík. Manneh er í dag framherji hjá þýska úrvalsdeildarliðinu Werder Bremen og hefur síðustu vikur spilað í fremstu víglínu liðsins.

Manneh fékk tækifærið þegar Aron Jóhannsson var dæmdur í þriggja leikja bann. Aron kom við sögu sem varamaður í síðasta leik og er samkvæmt aðstoðarþjálfaranum Markus Feldhoff enn að koma sér í leikform.

„Ég er auðvitað ekki ánægður með að sitja á bekknum. Ég vil spila hverja einustu mínútu. Þetta er erfið staða,“ sagði Aron í samtali við Kreiszeitung í gær.

„Ég er vanalega þolinmóður maður. Ég þarf að vera það áfram og leggja hart að mér. Það eina sem ég get gert er að gefa allt mitt í þetta.“

Sjá einnig: Ekki langt frá því að tárast eftir endurkomumarkið

Þögull um ferðalagið frá Afríku

Manneh er nítján ára Gambíumaður sem á sér forsögu sem er vafalaust fordæmalaus þegar kemur að atvinnumanni í knattspyrnu í einni sterkustu deild Evrópu.

Fyrir tveimur árum síðan flúði Manneh, þá sautján ára, frá heimalandi sínu. Gambía er eitt fátækasta ríki heims og hefur verið undir eftirliti mannréttindasamtaka víða um heim.

Manneh náði að koma sér til Evrópu en hefur aldrei viljað greina frá því hvernig hann komst frá Afríku til Evrópu. Síðustu ár hefur það þó verið algeng sjón að flóttamenn frá Afríku hafi farið sjóleiðina til Evrópu, um Miðjarðarhaf.

Manneh komst alla leið til Þýskalands og fékk skýli í flóttamannabúðunum Lesum, sem eru rétt utan borgarmarkanna við Bremen. Frítíma sínum varði hann að spila fótbolta og fékk hann tækifæri að æfa með unglingaliðum neðrideildarfélagsins Blumenthaler SV.

Hæfileikarnir augljósir

Þjálfari Blumenthaler, Farbrizio Muzzicato, þurfti bara að sjá Manneh spila í nokkrar mínútur til að sjá að um hæfileikaríkan pilt væri að ræða.

„Það hefðu allir séð þetta. Líka þeir sem lítið vit hafa á fótbolta,“ sagði Muzzicato í samtali við þýska fjölmiðla á sínum tíma.

Manneh vakti athygli margra þýskra liða. Werder Bremen fylgdist reglulega með honum, sem og útsendarar frá Hamburg, Schalke og Wolfsburg. En Manneh ákvað að halda tryggð við sína nýju heimabyggð og daginn eftir að hann varð átján ára samdi hann við Werder Bremen og byrjaði að æfa með U-23 liði félagsins.

Þjálafri U-23 liðsins þá var Alexander Nouri - sá hinn sami og var ráðinn þjálfari aðalliðs Werder Bremen þann 18. september eftir að Viktor Skripnik var sagt upp störfum.

Daginn áður hafði Werder Bremen tapaði fyrir Gladbach, 4-1, og var það þriðja tap liðsins í jafn mörgum leikjum á tímabilinu. Í þeim sama leik fékk Aron að líta rauða spjaldið fyrir kjaftbrúk. Aron fullyrti reyndar sjálfur síðar í fjölmiðlum að um misskilning hefði verið að ræða og að dómaranum hefði misheyrst.

Sjá einnig: Aron um rauða spjaldið: Dómaranum misheyrðist

Beint í byrjunarliðið

Undir stjórn Nouri hefur Werder Bremen náð að ná í sín fyrstu stig á tímabilinu. Vegna fjarveru Arons ákvað Nouri að henda Manneh beint í djúpu laugina og setti hann í byrjunarliðið í leik gegn Mainz. Var það fyrsti leikur Bremen undir stjórn Nouri og Manneh hafði aldrei fyrr spilað með aðalliði Werder Bremen í mótsleik.

Manneh komst í dauðafæri strax á fjórðu mínútu en náði ekki að skora. En hann spilaði vel og var Werder Bremen með 1-0 forystu þegar honum var skipt af velli snemma í síðari hálfleik.

Mainz vann að vísu leikinn, 2-1, en Manneh hefur haldið sæti sínu í byrjunarliðinu síðan þá og spilað síðustu fimm leiki liðsins. Hann sló í gegn um þarsíðustu helgi, er hann skoraði eitt og lagði upp annað í 2-1 sigri á stórliði Bayer Leverkusen.

Werder Bremen mætir Freiburg á heimavelli um helgina og gæti þá unnið sinn þriðja leik í röð á Weserstadion. Líklegt er að Manneh verði þar í fremstu víglínu. Á meðan þarf Aron að bíða þolinmóður á hliðarlínunni - í bili að minnsta kosti.