Laumaði sér inn á völlinn og fékk bolamynd með Ronaldo

„Besti dagur lífs míns,“ skrifar Ernesto Ferrari Henriquez á Facebook-síðu sína við mynd sem hann náði af sér og Cristiano Ronaldo í gær.

Drengurinn náði að lauma sér inn á Þórsvöll í Færeyjum rétt áður en síðari hálfleikur í leik Færeyja og Portúgal hófst.

Ronaldo tók vel á móti stráknum og stillti sér kurteislega upp í mynd með honum. Hann hló síðan bara er strákurinn hljóp burt fagnandi. Skömmu síðar voru öryggisverðir búnir að tækla drenginn í gervigrasið.

Drengurinn sem nældi sér í bolamyndina er frá Perú en er búsettur í Færeyjum. Samkvæmt Facebook býr hann í Runavik.

Að lenda í svona uppákomum er að verða nánast daglegt brauð hjá Ronaldo og Lionel Messi. Þeir hafa alltaf tæklað þessa stöðu á sama hátt. Stillt sér upp í mynd með þeim er hlaupa inn á völlinn.

Portúgal vann leikinn 6-0 og Ronaldo skoraði fjórða mark Portúgal í leiknum.