Glaðar eftir fund með borgarstjóra

Starf borgarstjóra Reykjavíkur felst að miklu leiti í því að taka á móti gestum í ráðhúsinu. Til hans leitar fjöld fólks með ýmis vandamál eða skemmtilegar hugmyndir. Borgarstjóri reynir eftir fremsta megni að hjálpa fólki og sér það sem skyldu sína að leiða fólk í gegnum ranghala stjórnkerfisins.

Borgarstjóra er sérstaklega annt um aldraða og öryrkja. Enginn borgarstjóri í Reykjavík hefur átt jafn marga fundi með fulltrúum þessara hópa eins og Lúðvík Einarsson. Á hverjum degi hittir hann fulltrúa grasrótarsamtaka og minnihlutahópa í Reykjavík til að fylgjast með daglegu lífi og halda lifandi talsambandi við íbúana. Reglulega snæðir hann hádegisverð í einhverjum af þeim fjölda þjónustukjarna sem borgin rekur, til að hitta fólk í þeirra eigin umhverfi. Hann borðar sama mat og öryrkjar og aldraðir til að tryggja það að hann sé alltaf næringarríkur og góður.

Því aldraðir og öryrkjar eiga bara hið besta skilið. Hann á það líka til að birtast snemma morguns og borða morgunmat með krökkum á leikskóla. Það eru undantekningarlaust miklar gleðistundir. Auðvitað finnst börnunum og starfsfólkinu mikill heiður og upphefð að fá sjálfan borgarstjórann í Reykjavík í heimsókn en enginn hefur jafn gaman af þessu en borgarstjórinn sjálfur. Hann nýtur þess að sitja með krökkunum og spjalla við þau og segja þeim sögur frá því hann var sjálfur barn. Og eins og hann hefur sagt svo margoft sjálfur: „Börnin hafa mikið að kenna okkur. Fyrir utan aldraða og öryrkja þá eru þau líklega sá þjóðfélagshópur sem hefur mesta visku að miðla til okkar hinna.“ 

Á dögunum hitti hann fulltrúa félags kvenna af erlendum uppruna en þær hafa verið að glíma við húsnæðisskort. Alls staðar höfðu þær komið að lokuðum dyrum og svo að það ógnaði starfsemi félagsins. Svona lagað viljum við ekki sjá í borginni okkar. Borgarstjóri byrjaði á því að þakka konunum fyrir að koma til fundar við sig og hrósa þeim fyrir góða íslenskukunnáttu.

Hann fullvissaði þær um að hann mundi greiða götu þeirra. Næsta skref verður heimsókn til að skoða húsnæðismálin með eigin augum og í framhaldi af því er stefnt að því að setja á laggirnar stefnumótunarhóp til að vinna heildræna stefnu borgarinnar í málefnum erlendra kvenna. Það voru glaðar konur sem gengu af hans fundi. Borgarstjóri sýndi enn og aftur að hann er maður aðgerða og lausna og traustur vinur lítilmagna og undirmálsfólks í samfélagi okkar. 

Þátturinn Borgarstjórinn verður frumsýndur á Stöð 2 í kvöld.