Sagði sig úr Framsóknarflokknum eftir niðurstöðu kjördæmaþings í gær.

Fyrrverandi oddviti Framsóknarmanna á Akureyri sagði sig úr Framsóknarflokknum eftir að niðurstaðan um oddvita sæti flokksins í Norðausturkjördæmi varð ljós en þar hlaut Sigmundur Davíð Gunnlaugsson yfirburða kosningu. Þórunn Egilsdóttir sem endaði í öðru sæti á framboðslistanum gefur ekki upp hvort hvort hún styðji núverandi formann til áframhaldandi setu á komandi flokksþingi.

Flokksþing Framsóknarflokksins verður haldið um næstu mánaðamót þar sem Sigmundur Davíð býður sig fram til áframhaldandi formennsku en hann styrkti stöðu sína í afgerandi kosningu í oddvitasætið í Norðausturkjördæmi, í gær.

„Ég hef hins vegar fyrst og fremst fundið fyrir gríðarlegum stuðningi meðal flokksmanna og það sem er líka afskaplega mikilvægt er, og hefur hjálpað mér mjög mikið að undanförnu, er hvað ég hefur fundið mikinn stuðning frá fólki utan flokks. Ég tel stöðu flokksins gríðarlega sterka fyrir komandi kosningar vegna þess að við erum að klára hérna vinnu sem hefur skilað meiri árangri heldur en að ég gerði ráð fyrir að nokkur hafði þorað að vona. Jafnvel ég, bjartsýnismaðurinn ég, þorði ekki að vona að þetta gengi svona vel. Þannig að við erum komin með gífurlega sterkan grunn til þess að byggja á og okkur langar að halda áfram að byggja á þeim grunni,“ segir Sigmundur Davíð Gunnlaugsson.

Þrátt fyrir yfirburða kosningu sem Sigmundur Davíð hlaut virðast Framsóknarmenn ekki allir á eitt sáttir með velgengni formannsins í gær og sagði fyrrverandi oddviti Framsóknarmanna á Akureyri, Jóhannes Gunnar Bjarnason, sig úr flokkum eftir að niðurstaðan varð ljós.

Sömuleiðis er núverandi oddviti flokksins á Akureyri, Guðmundur Baldvin Guðmundsson, ekki sáttur.

Fjögur Framsóknafélög á landsbyggðinni, í Austur Húnavatnssýslu, Borgarfirði og Mýrum, í Reykjanesbæ og í Árborg hafa hvatt Sigurð Inga, varaformann, til að gefa kost á sér til formanns flokksins gegn Sigmundi Davíð.

„Það kom mér svo sem ekki á óvart, ekkert af þessum tilvikum sem komið hafa upp og þetta er algengt í aðdraganda flokksþinga eða landsfunda að félög fara að álykta og hvetja ákveðna menn til dáða og ekkert hægt að setja út á það en ég vona bara að menn mæti allir, Framsóknarmenn, sem flestir til flokksþings og það nýtist okkur vel til þess sem birtist svo í framhaldinu sem samheldinn öflugur hópur með frábær mál til að vinna að eftir kosningar,“ segir Sigmundur Davíð.

Þórunn Egilsdóttir sem endaði í öðru sæti á framboðslista kjördæmisins vill ekki gefa upp hvort hún styðji núverandi formann til áframhaldandi formennsku.

„Ég styð þann formann sem að flokkurinn velur sér,“ sagði Þórunn Egilsdóttir.

En núverandi formann?

„Ég hef alltaf stutt formanninn,“ sagði Þórunn.

Kemurðu til með að kjósa Sigmund í formannskjörinu?

„Ég ætla bara láta það koma í ljós á flokksþinginu,“ sagði Þórunn.

Í reglum um tvöfalt kjördæmaþing Framsóknarflokksins, eins og haldið var í gær, sem birtar eru á heimasíðu flokksins, kemur fram í 30. grein að kjósendur skulu framvísa persónuskilríkjum þegar kosið er. Og var það áréttað við fundargesti í gær.

„Þar eru kjörseðlarnir afhentir og þið þurfið að hafa persónuskilríki meðferðis, það er samkvæmt reglum og það á að tékka á því,“ sagði Eyþór Elíasson, formaður kjörstjórnar við fundarmenn á fundinum í gær.

Fréttastofa veitti því þó athygli við afhendingu kjörgagna í gær að fáir sem engir þurftu að framvísa persónuskilríkjum.

Hvort þetta komi til með að hafa áhrif á niðurstöður kosninganna í gær skal ósagt látið.