Pepsi-mörk kvenna: Eiði ekki Vanda(ðar) kveðjurnar

Ummæli Eiðs Benedikts Eiríkssonar, þjálfara Fylkis, eftir 4-0 tap Árbæinga fyrir Breiðabliki í gær voru til umræðu í Pepsi-mörkum kvenna sem verða á dagskrá á Stöð 2 Sport HD klukkan 20:00 í kvöld.

Eiður fór mikinn í viðtali við Fótbolta.net eftir leikinn og lét sínar stelpur heyra það.

„Það vantaði allt, við hefðum alveg eins getað rukkað leikmenn inn í fyrri hálfleikinn. Ég vona að það sé hægt að gera það eftir á,“ sagði Eiður m.a. í viðtalinu og bætti því við að frammistaðan hefði verið til skammar fyrir liðið og félagið.

Vanda Sigurgeirsdóttir kvaðst ekki hrifin af þessari aðferð Eiðs.

„Hann sagði sjálfur að hann hefði ekki komið strax í viðtalið því hann vildi róa sig. Ég held hann hefði átt að koma ennþá seinna eða sleppa viðtalinu og senda einhvern annan,“ sagði Vanda sem var gestur Helenu Ólafsdóttur í Pepsi-mörkunum ásamt Rögnu Lóu Stefánsdóttur.

„Hann var eiginlega ekki í því skapi sem þjálfari á að vera þegar hann fer í viðtal í fjölmiðlum.“

Eiður er aðeins 24 ára gamall og að þjálfa meistaraflokk í fyrsta sinn. Vanda og Ragna Lóa sögðu að reynsluleysið hefði e.t.v. komið í ljós þarna.

„Hann er mjög ungur, nýhættur með snuð,“ sagði Ragna Lóa og hló.

„Reynsluleysið skein í gegn í þessu viðtali. Ég myndi taka á þessu og biðjast afsökunar,“ bætti Vanda við.

Fylki hefur ekki gengið vel í sumar og aðeins unnið þrjá leiki. Árbæingar eru þó fjórum stigum frá fallsæti þegar fjórum umferðum er ólokið í Pepsi-deild kvenna.

Innslagið í heild sinni má sjá í spilaranum hér að ofan.