Nesty: Hrafnhildur er yndisleg persóna

Hrafnhildur Lúthersdóttir hefur náð sögulegum árangri á Ólympíuleikunum í Ríó og það er ekki að sjá annað en kynni hennar af frægum Ólympíumeistara hafi haft góð áhrif á hana síðasta árið sem hefur verið einstaklega sögulegt fyrir sundkonuna frábæru úr Hafnarfirðinum.

Fáir gleyma því sem á horfðu þegar Anthony Nesty vann einu gullverðlaunin í sögu Súrínams á Ólympíuleikunum í Seoul fyrir 28 árum. Nesty vann þar Bandaríkjamanninn Matt Biondi með einu sekúndubroti í 100 metra flugsundi en fyrir sundið bjuggust allir við að Biondi tæki gullið.

Anthony Nesty varð algjör þjóðhetja heima í Súrínam og andlit hans var meðal annars sett á peninga í heimalandinu. Sigur hans vó líka þungt í réttindabaráttu þeldökkra í heimalandinu en hann var aðeins annar þeldökki íþróttamaðurinn sem náði að vinna gull í einstaklingssundi á Ólympíuleikum. Súrínam hefur ekki unnið aftur gull á Ólympíuleikum.

Síðan eru liðin mörg ár og Nesty er nú orðinn virtur þjálfari hjá skólaliðinu Florida Gators. Þar kynntist hann íslensku sundkonunni Hrafnhildi Lúthersdóttur sem hefur tekið enn fleiri framfaraskref eftir að þau fóru að vinna saman.

Mjög stoltur af henni

„Það er mikill heiður fyrir hana að ná svona langt og verða fyrsta íslenska konan sem kemst í úrslit á Ólympíuleikum. Ég er mjög stoltur af henni en auðvitað vildi ég að hún færi hraðar,“ segir hann en undirritaður hitti hann skömmu eftir sund Hrafnhildar í undanrásum í 200 metra bringusundi í gær. Hrafnhildur hefur ekki verið nálægt Íslandsmetum sínum á leikunum en hefur komist áfram sem er fyrir öllu.

„Aðalatriðið hjá okkur er að sjá sundfólkið okkar bæta sig og Hilda hefur gert það allan sinn sundferil. Það segir góða sögu af henni og þjálfurum hennar heima á Íslandi eins og Klaus-Jürgen Ohk,“ segir hann en Ohk, sem var þjálfari Hrafnhildar í SH, er líka í Ríó og þeir hjálpast að við að leiðbeina Hrafnhildi á leikunum.

„Hún er ein af bestu íþróttamönnum í heiminum því þegar þú kemst í úrslit á Ólympíuleikum þá ertu einn af þeim bestu. Þegar þú vinnur verðlaun á Evrópumótinu þá ertu einn af þeim bestu í heimi. Það er mikill heiður fyrir mig að fá að vera hérna og þjálfa hana,“ segir Anthony Nesty. Hann hrósar hafnfirsku sunddrottningunni.

„Hún er frábær karakter. Hilda er yndisleg persóna sem hugsar vel um alla í kringum sig. Við elskum það að hafa hana í okkar liði því hún er frábær leiðtogi sem lætur verkin tala.“

Sigurinn hjá Anthony Nesty í Seoul 1988 gerði hann heimsfrægan og Hrafnhildur segist hafa horft oftar en einu sinni á það þegar hann vann gullið. Nesty vill þó ekki mikið ræða það við þá sundmenn sem hann þjálfar.

Ræði ekki um gullið mitt

„Ég hef ekki talað um Ólympíugullið mitt því ég vil ekki þröngva því upp á fólk. Með því kæmi meiri pressa en mitt sundfólk þarf á að halda. Það fylgir því nógu mikil pressa að synda á þessu sviði. Þau eru forvitin en hafa ekki þorað að spyrja mig ennþá,“ segir Anthony

Nesty. En hvað með framtíðina hjá Hrafnhildi?

„Hún er orðin 25 ára gömul og hefur verið að bæta sig á hverju ári. Hún ræður þessu sjálf. Hún er með góðan bakgrunn, gott þjálfarateymi í kringum sig bæði með Klaus og okkur hjá Florida Gators. Ef hún vill halda áfram að synda þá tökum við vel á móti henni,“ segir Anthony.

Hrafnhildur hefur tekið hvert sögulega skrefið á fætur öðru síðasta árið og það er ljóst að hún hefur fundið sig vel hjá Anthony Nesty.

„Ég kem með reynslu en hún græðir líka á því að vera í liðsumhverfinu hjá Florida og að keppa með okkar skóla. Það hefur hjálpað henni. Það er samt mjög sérstakt og mjög erfitt að vera alltaf að taka næsta skref og bæta sig meira,“ segir Anthony að lokum.