Lykilmaður U-18 ára landsliðsins til Skallagríms

Körfuknattleiksdeild Skallagríms hefur samið við Eyjólf Ásberg Halldórsson um að leika með liðinu í Domino's deild karla á næsta tímabili. Þetta kemur fram í fréttatilkynningu frá Skallagrími.

Eyjólfur er fæddur árið 1998, uppalinn hjá KR, en kemur til Skallagríms frá ÍR þar sem hann lék á síðasta tímabili.

Eyjólfur hefur leikið með öllum yngri landsliðum Íslands og var lykilleikmaður íslenska U-18 ára liðsins á EM í sumar.

Í vor varð Eyjólfur Íslandsmeistari með ÍR í drengjaflokki þar sem hann var valinn besti leikmaður úrslitaleiksins með 24 stig, 13 fráköst og þrjár stoðsendingar.

Með þessari ráðningu er lið Skallagríms full mannað fyrir átökin í vetur að því er fram kemur í tilkynningunni. Áður voru Darrel Flake og Magnús Þór Gunnarsson komnir til Skallagríms sem og Bandaríkjamaðurinn Flenard Whitfield.