Björgunaraðgerðir við Sveinsgil: Ákveðið að draga úr aðgerðum í nótt

Ákveðið hefur verið að draga úr aðgerðum með kvöldi við leitina að franska ferðamanninum sem féll ofan í Sveinsgil í gær. Leitin hefur enn ekki borið neinn árangur og búist er við því að aðgerðum á svæðinu verði haldið áfram af krafti strax aftur í fyrramálið.

Lögreglan á Suðurlandi segir að aðgerðir muni halda óbreyttar áfram til klukkan tíu í kvöld en eftir það verði mannskap á svæðinu fækkað.

Aðstæður á svæðinu eru erfiðar og vatnavextir miklir sem gerir aðgerðina hættulega. Þetta er ein umfangmesta björgunaraðgerð sem gerð hefur verið á þessu slóðum en í morgun voru um 53 óbreyttir björgunarsveitamenn á slysstað.