Tók við Þrótti og liðið hefur unnið alla leiki sína síðan

Þróttur samdi á dögunum við Nik Chamberlain um að taka að sér starf aðalþjálfara meistaraflokks og 3. flokks kvenna í knattspyrnu, en aðalþjálfari liðsins, Ásmundur Vilhelmsson, lét af störfum fyrir nokkrum vikum.

Aðstoðarþjálfari meistaraflokks kvenna sem fyrr er Rakel Logadóttir, en hún hefur gegnt því starfi frá því síðastliðinn vetur.

Þróttarar biðu þó með að tilkynna um nýja þjálfarann þar til rétt fyrir fjórða leik Nik Chamberlain með liðið sem var í gær. Þróttur vann þá stórsigur á Fram.  

Nýja þjálfarateymið í Laugardalnum fer mjög vel af stað og er nú þegar komið með 12 stig af 12 mögulegum í fyrstu fjórum leikjum sínum.

Sigur náðist gegn Hvíta riddaranum í þeirra fyrsta leik saman, 6-2 á heimavelli. Í kjölfarið komu tveir 2-0 sigrar á útivelli, gegn KH og Skínandi. Þróttur vann síðan 5-0 stórsigur á Fram í Laugardalnum í gærkvöldi.

„Ég er virkilega spenntur og þakklátur fyrir að hafa fengið þetta tækifæri hjá Þrótti. Við höfum farið vel af stað saman, en eigum þó langt í land með að ná þeim markmiðum sem við höfum í sameiningu sett okkur. Ég finn að stelpurnar eru hungraðar í árangur, enda er komin smávegis hefð fyrir því hérna í Laugardal að eiga lið í fremstu röð," segir Nik Chamberlain, nýráðinn þjálfara meistaraflokks kvenna í knattspyrnu í fréttatilkynningu Þróttara.

„Lengd samningsins er yfir fjögur tímabil og færir þess vegna ákveðna ró yfir hópinn og starfið þar. Nú getum við skoðað markmið til langtíma í samhengi við þróun yngri flokka upp á efsta stig meistaraflokks. Yngri stelpurnar þurfa að hafa vissu um að sama heimspeki í þjálfun renni gegnum alla flokka og að grundvallaratriðin, leikstíllinn og nálgunin breytist lítið milli ára. Það er höfuðatriði til að ná stöðugum árangri og byggja starfið upp til langtíma,“ bætti Nik við.