Peningurinn uppurinn hjá Tólfunni sem snýr heim á morgun

Tólfan, stuðningsmannasveit íslenska landsliðsins, kemur heim frá Frakklandi á morgun þrátt fyrir að þátttöku íslenska liðsins á Evrópumóti karla í knattspyrnu sé ekki lokið. Ísland tryggði sig áfram í sextán liða úrslit mótsins með fræknum sigri á Austurríkismönnum í gær og mætir Englendingum á mánudag.

„Við erum búnir með „budget“-ið þannig að við erum að koma heim á föstudaginn og svo sjáum við til,“ segir Benjamín Hallbjörnsson, formaður Tólfunnar. „Kannski verður þetta einhver klikkun og við förum aftur á sunnudaginn.“

Um fimmtán meðlimir Tólfunnar hafa verið á öllum þremur leikjum Íslands á mótinu til þessa en aðrir komið og tekið einn eða tvo. Af þeim fimmtán eru fimm með sérstaka passa sem leyfa þeim að burðast með trommur og slíkt upp í stúku.

Benjamín, sem svarar kallinu Benni bongó á vellinum, segir alla í hópnum langa til þess að vera áfram en fjárhagurinn sé takmarkaður. Þá spili fleira inn – menn þurfi hreinlega að fara að mæta til vinnu eftir dvölina í Frakklandi.

Sjá einnig: Allt sem þú þarft að vita til að komast til Nice

Hann útilokar þó alls ekki að einhverjir taki sig saman og kýli á það að fara út með skömmum fyrirvara. Þó svo það gæti verið erfitt að krækja í miða á 35 þúsund manna völlinn í Nice.

„Ef við myndum taka einhverja ævintýramennsku á þetta, þá reddast það bara,“ segir hann vongóður. „Það verða miðar fyrir utan völlinn á uppsprengdu verði. Við erum að spila við Englendinga og þeir kunna manna best að vera með brask.“

Á Benna er það að heyra að England sé það lið sem Tólfumenn hefðu helst viljað mæta á mótinu enda enska deildin sú vinsælasta á Íslandi. Hann á von á því að Ísland nái að standa í ensku stjórnstjörnunum og jafnvel leggja þær að velli.

„Þeir eru ekki búnir að eiga of gott mót,“ segir hann. „Alltof margir „púlarar“ í liðinu.“

Íslendingar sem fylgst hafa með leikjum karlalandsliðsins í sjónvarpinu eru ef til vill útkeyrðir eftir alla spennuna og fögnuðinn. Það er því rétt hægt að ímynda sér hvernig liðsmönnum Tólfunnar líður.

„Heilsan er upp og ofan,“ viðurkennir Benni, sem er kátur en nánast pínlega hás í símann við blaðamann. „Þeir sem hafa verið hérna allan tímann – það er búið að draga smá af þeim.“