Einn árásarmannanna felldur af lögreglu

Einn af mönnunum sem skutu á lögreglumenn í Brussel í dag hefur verið felldur í skotbardaga. Tveir til viðbótar ganga lausir í borginni. Fyrr í dag voru fjórir lögregluþjónar særðir þar sem þeir gerðu atlögu að íbúð í Brussel. Aðgerðirnar tengjast árásunum í París í fyrra.

Maðurinn sem var felldur sást í garði nærri íbúðinni og var hann vopnaður. Markmið áhlaupsins var að fanga Salah Abdelsam, 26 ára Frakka, sem grunaður er um aðild að hryðjuverkunum í París. Hann flúði til Belgíu skömmu eftir árásirnar, þar sem bróðir hans sprengdi sig í loft upp.

Samkvæmt frétt Sky News höfðu lögregluþjónar komið sér fyrir við inngang íbúðarinnar og var skotið á þá í gegnum hurð. Árásarmennirnir flúðu svo upp á þak hússins og komust þeir þaðan á brott.



Lögregluaðgerðin á sér stað í úthverfinu Forest, suður af miðborg Brussel.

Uppfært 20:00

Maðurinn sem var felldur af lögreglu er ekki Salah Abdelsam.

Hér má sjá beina útsendingu frá Brussel. Sjá má þungvopnaða lögreglþjóna ganga um götur borgarinnar.