Fast 8 í ísakstri á Mývatni og steypa einum bíl ofan í vatnið

Umhverfisstofnun hefur gefið leyfi til að kvikmynda þrjá til fjóra fólksbíla á ísilögðu Mývatni í mars næstkomandi í tengslum við tökur á erlendri kvikmynd. Það mun vera myndin Fast 8, áttunda myndin í Fast and the Furious myndaflokknum. Einnig hefur verið gefið leyfi til að sökkva skel af bíl í vatnið.

Bíllinn verður í vír

RÚV greindi frá því á þriðjudag að leyfi hefði verið gefið fyrir því að sökkva skel af bíl í vatnið. Samkvæmt gögnum frá Umhverfisstofnun verður brotin vök í ísinn og bíllinn látinn gossa ofan í vatnið. Hann verður berstrípaður af öllu öðru en ytra borðinu og á því ekki að skilja eftir sig mengun.

Samkvæmt gögnunum verður bíllinn í vír og dreginn upp fljótlega eftir að honum er steypt út í vatnið. Þá verður sex manna kafarateymi á staðnum til að gæta þess að allt fari eins og áætlanir gera ráð fyrir.

Ekki liggur fyrir nákvæmlega hvar bílnum verður steypt ofan í Mývatn en ísaksturinn mun fara fram á Álftavogi í Syðriflóa Mývatns, samkvæmt leyfi stofnunarinnar. 

Hundrað manna teymi

Tökurnar fara fram í mars næstkomandi og er gert ráð fyrir hundrað manna teymi koma að kvikmyndatökunum. Setja á upp tjald fyrir starfsmenn á bílastæði við gömlu sundlaugina í Álftagerði á meðan tökunum við Mývatn stendur yfir. 

Samkvæmt lýsingu í gögnum Umhverfisstofnunar kemur fram að mögulegt sé að jökum úr frauðplasti verði stillt upp á tökustað á meðan tökur fara fram. Þeir verða svo fjarlægðir að tökum loknum. Til greina kemur að taka loftmyndir úr þyrlu af þessum ísakstri.

Meðal skilyrða sem Umhverfisstofnun setti vegna kvikmyndagerðarinnar er að starfsmenn gangi snyrtilega um svæðið og forðist allt rask. Allur akstur utan vega og merktra slóða er óheimill nema á frosinni, snævi þakinni jörð. Stofnunin mun hafa eftirlit með framkvæmdunum og frágangi.

Tekin upp á nokkrum stöðum

Vísir hefur áður fjallað um tökurnar á Fast 8 en auk þess að vera tekin upp á Norðurlandi er einnig búið að heimila tökur á Akranesi. Heimildir Vísis herma að tökuliðið ætli að framkvæma stærstu sprengingu sem gerð hefur verið hér á landi. Það verður þó ekki á Akranesi.

Fast and the Furious myndaflokkurinn er einhver sá stærsti sem nú er í gangi í heiminum en milljandi hagnaður hefur verið af myndunum. Síðasta myndin í flokknum, sem hét Furious 7, er sjötta tekjuhæsta mynd allra tíma með tekjur upp á 1.515 milljónir dollara, jafnvirði 202 milljarða íslenskra króna, í miðasölu.



Leikarinn Vin Diesel hefur verið aðal maðurinn við gerð myndanna, sem leikari og framleiðandi.