Ófærð fær lofsamlega dóma í Bretlandi: „Til allrar hamingju, er hún virkilega góð“

Tveir fyrstu þættirnir af íslensku sjónvarpsþáttaröðinni Ófærð voru frumsýndir BBC 4 í Bretlandi í gærkvöldi. Nú þegar hafa birst dómar hjá bresku blöðunum Telegraph og The Guardian þar sem þáttaröðinni fær góða dóma.

Gagnrýnandi Telegraph, Ceri Radford, gefur fyrstu tveimur þáttunum fjórar stjörnur af fimm og segir um að ræða frábært og spennuþrungið drama.

Ceri segist hafa verið svo heilluð af fyrstu fimm mínútum þáttarins að hún gleymdi að hann var textaður og reyndi að hækka í íslenska talinu, sem hún skilur ekkert í. Hún segir Ófærð vera þáttaröð sem tilvalin til að kúra yfir fram að vori.

Hún segir lögreglustjórann Andra, leikinn af Ólafi Darra Ólafssyni, alveg eins geta verið frænda risans Hagrid úr Harry Potter-sögunum en gagnrýnandi The Guardian, Euan Ferguson, segir Andra líta út eins og vinalegan björn.

Euan tekur fram að Ófærð sé dýrasta sjónvarpsþáttaröð frá upphafi á Íslandi, framleiðslukostnaðurinn nam um milljarði króna, og segir byrjunina lofa afar góðu. Hann segir þá sem standa að þáttaröðinni ná að framkalla stórkostlega innilokunarkennd, enda gerist ófærð í þorpi úti á landi þar sem er algjörlega ófært vegna veðurs, og tekur Euan fram að hann taki glaður þátt í þeirri innilokun.

Á vefnum The Killing Times TV segir um Ófærð: „Þetta er Agatha Christie, þetta er Anne Holt og þetta er einnig dýrasta sjónvarpsþáttaröð Íslands. Til allrar hamingju, er hún virkilega góð.“

Í tilkynningu frá fyrirtækinu sem framleiðir Ófærð, RVK Studios, kemur fram að fyrsti þátturinn var sýndur klukkan 9 á BBC 4 í gærkvöldi, sem er sami sýningartími og dönsku þættirnir Glæpurinn, Höllin og Brúin hafa fengið.

Enska heiti Ófærðar er Trapped og segir RVK Studios Breta hafa verið duglega við að tísta um þáttinn en umræðuna má sjá hér fyrir neðan:

#trapped Tweets