Spilum af sama krafti gegn Íslandi og á EM

Steffen Weinhold, fyrirliði þýska landsliðsins, segir að það dugi ekkert minna til í æfingaleikjunum gegn Íslandi um helgina að spila af sama krafti og liðið mun gera á EM í Póllandi.

Liðin mætast tvívegis ytra um helgina en EM hefst svo í næstu viku. Dagur Sigurðsson er þjálfari þýska landsliðsins.

Sjá einnig: Dagur varar við Íslandi

„Maður fer ekki á stórmót og ætlast til þess að maður fari úr núlli í hundrað í fyrsta leik,“ sagði Weinhold við þýska fjölmiðla. „Maður verður að mæta til leiks í æfingaleiki líkt og um mótsleik væri að ræða.“

Dagur sagði sjálfur í gær að hans menn myndu spila til sigurs. „Það er besti undirbúningurinn. Við ætlum að prófa þau vopn sem við eigum í leikjunum gegn Íslandi.“

Sjá einnig: Dagur syngur og spilar í þýska sjónvarpinu

Þýskaland vann öruggan sigur á Túnis, 37-30, á þriðjudag en Ísland tapaði hins vegar gegn Portúgal á heimavelli á miðvikudag, 32-28. Þjóðverjar hafa misst út marga menn vegna meiðsla en Dagur vonast til þess að hornamaðurinn Rune Dahmke, sem spilaði ekki gegn Túnis, verði klár fyrir leiki helgarinnar.