Bæði ungir og gamlir fá að spila mest hjá Tindastól

Dominos-deild karla í körfubolta fer aftur af stað í þessari viku en það komu athyglisverðar niðurstöður í ljós þegar Fréttablaðið skoraði skiptingu spilatíma í fyrstu ellefu umferðunum.

Markmiðið var að finna út hjá hvaða liðum ungir leikmenn (leikmenn yngri en tvítugt) og „gamlir“ leikmenn (leikmenn 32 ára og eldri) fengu flestar mínútur inni á vellinum í fyrri umferðinni.

Svo skemmtilega vildi til að það er spænski þjálfarinn Israel Martin hjá Tindastól sem treystir mest á unga og gamla leikmenn.

Nýliðar Tindastóls hafa slegið í gegn í vetur en liðið er í öðru sæti deildarinnar og hefur unnið 9 af fyrstu 11 leikjum sínum í Dominos-deildinni.

Í raun hafa Stólarnir aðeins misstigið sig einu sinni í deildinni til þessa því annað tapið kom í framlengdum útileik á móti hinu gríðarlega sterka KR-liði sem hefur unnið alla leiki sína. Það er aðeins stórtap á móti Haukum á Ásvöllum í desember sem slær á körfuboltagleðina á Króknum.

Tindastólsliðið er að mestu leyti skipað heimamönnum en þeir koma úr tveimur súper-kynslóðum, þeim gömlu sem eru allir fæddir í kringum 1980 og þeim ungu sem eru fæddir í kringum 1996. Þetta gerir það að verkum að enginn íslenskur leikmaður frá 21 árs til 29 ára hefur spilað eina sekúndu fyrir Stólana í fyrri umferðinni.

Haukar eru ekki langt á eftir Tindastól á listanum yfir flestar mínútur hjá ungum leikmönnum og eiga tvo leikmenn á topp sjö yfir flestar mínútur leikmanna sem voru 19 ára og yngri á árinu 2014. Grindavík á einnig tvo leikmenn meðal þeirra efstu og eru þeir báðir meðal fimm efstu. Tindastóll er aðeins með einn leikmann á topp tíu en alls hafa sjö leikmenn 19 ára og yngri fengið að spreyta sig hjá Israel Martin.

Snæfell er í 2. sætinu á eftir Stólunum á listanum yfir flestar mínútur hjá gömlu mönnunum en Hólmarar eru aftur á móti það lið þar sem ungir leikmenn hafa fengið minnst að spila. Snæfell á tvo leikmenn af þeim þremur efstu á listanum yfir flestar spilaðar mínútur hjá „gömlu“ mönnunum.

Fjölnir er síðan eina lið deildarinnar sem hefur ekki fengið eina sekúndu frá leikmanni sem er 32 ára eða eldri. Elsti maður liðsins og sá eini yfir 27 ára hefur ennfremur aðeins verið inni á vellinum í 52 sekúndur.

Nú er að sjá hvort ungu leikmennirnir hafa náð sér í nægilega reynslu og hvort þeir gömlu eigi nóg eftir á tankinum þegar nýliðarnir á Króknum mæta til leiks á nýju ári en fyrsti leikurinn er á móti Stjörnunni á fimmtudagskvöldið, liði sem er í 3. sæti á báðum listum og því ekki ólíkt uppbyggt liði Stólanna.

Flestar mínútur hjá þeim ungu  [Mínútur:sekúndur]

(Leikmenn fæddir 1995 og síðar, 19 ára og yngri)

Tindastóll 654:49

Haukar 603:2

Stjarnan 563:35

Grindavík 550:3

Njarðvík 363:49

Fjölnir 259:57

Keflavík 248:26

KR 190:7

Þór Þorl.  105:37

ÍR 103:45

Skallagrímur 60:44

Snæfell 39:00

Flestar mínútur hjá þeim gömlu  [Mínútur:sekúndur]

(Leikmenn fæddir 1982 og fyrr, 32 ára og eldri)

Tindastóll 729:35

Snæfell 658:36

Stjarnan  594:43

Njarðvík 562:19

Grindavík 541:43

Keflavík 385:51

KR 327:37

Þór Þorl.  302:21

Skallagrímur 186:20

Haukar 177:52

ÍR 52:22

Fjölnir 0:00



Flestar mínútur ungra leikmanna  [Mínútur:sekúndur]

(Leikmenn fæddir 1995 og síðar, 19 ára og yngri)

1. Dagur Kár Jónsson, Stjörnunni 354:57

2. Pétur Rúnar Birgisson, Tindastól 350:29

3. Kári Jónsson, Haukum 333:10

4. Oddur Rúnar Kristjánsson, Grindavík 221:12

5. Hilmir Kristjánsson, Grindavík  204:43

6. Maciej Stanislav Baginski, Njarðvík 191:22

7. Hjálmar Stefánsson, Haukum  180:30

8. Tómas Þórður Hilmarsson, Stjörnunni  171:7

9. Ragnar Helgi Friðriksson, Njarðvík  170:7

10. Eysteinn Bjarni Ævarsson, Keflavík  167:39

Flestar mínútur eldri leikmanna  [Mínútur:sekúndur]

(Leikmenn fæddir 1982 og fyrr, 32 ára og eldri)

1. Sigurður Á. Þorvaldsson, Snæfell 375:25

2. Darrel Keith Lewis, Tindastól 335:49

3. Pálmi Freyr Sigurgeirsson, Snæfell 331:11

4. Helgi Már Magnússon, KR 327:37

5. Marvin Valdimarsson, Stjörnunni 322:45

6. Nemanja Sovic, Þór Þ. 302:21

7. Logi Gunnarsson, Njarðvík 290:14

8. Ómar Örn Sævarsson, Grindavík 287:41

9. Mirko Stefán Virijevic, Njarðvík  272:5

10. Justin Shouse, Stjörnunni  271:58