Telja að Abdeslam hafi komist til Sýrlands

Franska leyniþjónustan telur að grunaði hryðjuverkamaðurinn Salah Abdeslam hafi komist til Sýrlands. CNN greinir frá þessu.

Abdeslam er einn bræðranna sem talinn er hafa átt þátt í hryðjuverkaárásunum í París þar sem 130 féllu. Abdeslam er talinn hafa keyrt einn mannanna sem sprengdi sjálfan sig í loft upp við Stade de France að kvöldi 13. nóvember.

Franska lögreglan fann í síðustu viku sprengjuvesti í ruslatunnu í Montrouge, úthverfi suður af París, en Abdeslam er talinn hafa verið í Monrouge kvöldið eftir árásirnar. Óljóst er þó hvort vestið hafi tilheyrt honum.

Sjá einnig: Á flótta undan ISIS og yfirvöldum: Hver er Salah Abdeslam og hvað gerði hann?

Lögregla hefur áður greint frá því að Abdeslam hafi mögulega átt að sprengja sjálfan sig í loft upp, guggnað og horfið af vettvangi.

Yfirgefinn bílaleigubill, sem skráður var á Abdeslam, fannst í 18. hverfi Parísarborgar, nokkru eftir árásirnar.