Haukur Helgi raðaði niður körfunum í Iðu í kvöld | Myndband

Haukur Helgi Pálsson var í miklum ham með Njarðvíkurliðinu í kvöld þegar Njarðvíkingar unnu sannfærandi 28 stiga sigur á FSu, 110-82, í Iðu á Selfossi.

Haukur Helgi fór meiddur af velli í síðasta leik en það var ekki að sjá að meiðslin væru eitthvað að angra hann lengur í leiknum í kvöld.

Haukur endaði með 31 stig, 14 fráköst og 6 stoðsendingar á tæpum 28 mínútum en hann hitti úr 6 af 10 þriggja stiga skotum sínum í leiknum.

Haukur var sérstaklega öflugur í fyrri hálfleiknum þar sem hann skoraði 23 stig og hitti úr 5 af 6 þriggja stiga skotum sínum. Hann var einnig með 7 fráköst og 4 stoðsendingar í fyrri hálfleiknum sem Njarðvíkingar unnu með 21 stigs mun, 57-36.

Haukur fann heldur betur fjölina sína á Selfossi og skoraði bæði fleiri stig og fleiri þriggja stiga körfur en hann hafði gert í fyrstu tveimur deildarleikjum sínum með Njarðvík.

Körfuboltakvöld á Stöð 2 Sport mun fjalla vel um alla leiki sjöttu umferðar annað kvöld en í spilaranum hér fyrir ofan má sjá Hauk Helga fara á kostum í Iðu í kvöld.